بھارتی فوج نے چینی فوجی کو چین کے حوالے کیا

بھارتی فوج نے آٹھ جنوری کو پکڑے گئے ایک چینی فوجی کو آج صبح تقریباً سوا دس بجے رہا کرتے ہوئے اسے چین کے حوالے کردیا ہے۔

رواں ماہ کی آٹھ تاریخ کو لداخ میں لائن آف ایکچوئل کنٹرول (ایل اے سی) پر پیپلز لبریشن آرمی (چینی فوج) کے ایک جوان کو گرفتار کیا تھا۔

بھارت نے اس چینی فوجی کو رہا کرتے ہوئے اسے چین کے حوالے کردیا ہے۔

وزارت دفاع نے اس تعلق سے بیان جاری کرتے ہوئے کہا تھا کہ 'لداخ کے چشول سیکٹر سے آٹھ جنوری کی صبح ایک چینی سپاہی کو زیر حراست لیا گیا۔ یہ سپاہی راستہ بھٹکنے کی وجہ سے غلطی سے بھارتی علاقے میں داخل ہوا تھا'۔

مزید یہ بھی کہا گیا تھا کہ 'چینی سپاہی کو آج شام یا ایک دو روز میں بارڈر میٹنگ پوائنٹ کے راستے سے واپس بھیج دیا جائے گا۔ اس حوالے سے تمام ضروری کارروائی اس وقت جاری ہے'۔

واضح رہے کہ گزشتہ برس اکتوبر کے مہینے میں بھارتی فوج نے لداخ کے دمچوک علاقے سے ایک چینی فوجی کو گرفتار کیا تھا۔ اس کے پاس سے کئی اہم دستاویز بھی برآمد کیے گئے تھے۔