کورونا ویکسینیشن کی تعداد 90 کروڑ سے تجاوز

ملک بھر میں ویکسینیشن مہم تیزی سے جاری ہے۔ ہر روز بھارت میں ویکسینیشن کا ریکارڈ بن رہا ہے۔ ہفتے کے روز ملک میں ویکسینیشن کی تعداد 90 کروڑ سے تجاوز کر گئی ہے۔

کووڈ -19 سے بچاؤ کے لیے جاری ملک گیر ویکسینیشن مہم کے تحت ہفتہ کو یہ تعداد 90 کروڑ سے تجاوز کر گئی۔ گزشتہ 24 گھنٹوں کے دوران 69 لاکھ 33 ہزار 838 افراد کو ویکسین کی خوراک دی گئی ہے۔ مرکزی وزیر صحت من سکھ منڈاویہ نے ٹویٹ کرکے اس کی جانکاری دی۔

ساتھ ہی انہوں نے اپنے ٹوئٹ میں لکھا کہ 'شاستری جی نے 'جے جوان - جے کسان' کا نعرہ دیا۔ اٹل جی نے 'جے وگیان' شامل کیا اور پی ایم نریندر مودی نے 'جے انوسندھان' کا نعرہ دیا۔ آج انوسندھان کا نتیجہ یہ کورونا ویکسین ہے۔

وہیں بھارت میں گزشتہ 24 گھنٹوں کے دوران کورونا کے 24 ہزار 354 نئے کیس درج کیے گئے ہیں، جبکہ اس دوران 25 ہزار 455 افراد صحت یاب ہوئے۔

مرکزی وزارت صحت کی رپورٹ کے مطابق گزشتہ 24 گھنٹوں میں 234 افراد کووڈ کی وجہ سے ہلاک ہوئے جس سے اب تک اموات کی کل تعداد 4 لاکھ 48 ہزار 573 ہو گئی ہے۔

پچھلے 24 گھنٹوں میں 25 ہزار 455 افراد صحت یاب ہوئے ہیں ، جس سے صحت یاب ہونے والوں کی کل تعداد 3 کروڑ 30 لاکھ 68 ہزار 599 ہوگئی ہے۔