BJP over Stalin Son Remark اسٹالن کے بیٹے کا سناتن دھرم پر متنازع تبصرہ، بی جے پی کا انڈیا اتحاد پر حملہ

مرکزی وزیر داخلہ امت شاہ نے کہا کہ اپوزیشن انڈیا اتحاد پر تنقید کرتے ہوئے کہا کہ وہ سناتن دھرم کی توہین کر رہے ہیں ۔ ڈی ایم کے اور کانگریس کے لیڈر صرف ووٹ بینک کی سیاست کے لیے سناتن دھرم کو ختم کرنے کی بات کر رہے ہیں۔ بی جے پی کے صدر جے پی نڈا نے کہا کہ سناتن دھرم کے تئیں نفرت کا سامان راہل کی محبت کی دکان میں کیسے فروخت کیا جا رہا ہے۔ تمل ناڈو کے وزیراعلیٰ ایم کے اسٹالن کے بیٹے نے کہا تھا کہ سناتن دھرم مساوات اور سماجی انصاف کے خلاف ہے، اس لیے اسے ختم کیا جانا چاہیے۔

ڈونگر پور: راجستھان میں اسمبلی انتخابات سے قبل بھارتیہ جنتا پارٹی کی 'پریورتن سنکلپ یاترا' کا افتتاح کرنے کے بعد خطاب کرتے ہوئے مرکزی وزیر داخلہ امت شاہ نے ایم کے اسٹالن کے بیٹے کی جانب سے دیے گئے سناتن دھرم پر متنازع تبصرہ پر اپوزیشن اتحاد انڈیا کو نشانہ بنایا۔ ڈونگر پور میں ایک عوامی ریلی سے خطاب کرتے ہوئے مرکزی وزیر داخلہ نے کہا کہ گزشتہ دو دنوں سے انڈیا اتحاد 'سناتن دھرم' کی توہین کر رہا ہے۔ ڈی ایم کے اور کانگریس کے لیڈر صرف ووٹ بینک کی سیاست کے لیے 'سناتن دھرم' کو ختم کرنے کی بات کر رہے ہیں۔ یہ پہلی بار نہیں ہے جب انہوں نے ہمارے 'سناتن دھرم' کی توہین کی ہو۔ اس سے پہلے (سابق وزیر اعظم) منموہن سنگھ نے بھی کہا تھا کہ بجٹ پر پہلا حق اقلیتوں کا ہے، لیکن ہم کہتے ہیں کہ پہلا حق غریبوں، قبائلیوں، دلتوں اور پسماندہ لوگوں کا ہے۔

تمل ناڈو کے وزیراعلیٰ ایم کے اسٹالن کے بیٹے وزیر ادھے نیدھی اسٹالن نے کہا تھا کہ 'سناتن دھرم' مساوات اور سماجی انصاف کے خلاف ہے اس لیے اسے ختم کیا جانا چاہیے۔ تب سے اس بیان کی بڑے پیمانے پر مخالفت شروع ہو گئی ہے۔ امت شاہ نے کہا کہ تمل ناڈو کے وزیر اعلیٰ کے بیٹے سمیت ڈی ایم کے لیڈر کہہ رہے ہیں کہ سناتن دھرم کو ختم کر دینا چاہیے۔ ان لوگوں نے ووٹ بینک کی تسکین کے لیے سناتن دھرم کی توہین کی ہے۔

مرکزی وزیر داخلہ نے کانگریس کے سابق سربراہ راہل گاندھی پر ہندو تنظیموں کا دہشت گرد تنظیم لشکر طیبہ سے موازنہ کرنے پر بھی نشانہ سادھا۔ انھوں نے کہا کہ آج کانگریس پارٹی کہتی ہے کہ اگر (نریندر) مودی جی جیتیں گے تو سناتن راج کرے گا۔ راہل گاندھی نے کہا کہ ہندو تنظیمیں لشکر طیبہ سے زیادہ خطرناک ہیں۔ راہل گاندھی نے ہندو تنظیموں کا موازنہ لشکر طیبہ سے کیا۔ قابل ذکر ہے کہ وزیراعظم مودی بھی اپوزیشن اتحاد انڈیا کا موازنہ ایسٹ انڈیا کمپنی، انڈین مجاہدین اور پاپولر فرنٹ آف انڈیا جیسی تنظیموں سے پہلے ہی کرچکے ہیں۔

بھارتیہ جنتا پارٹی کے صدر جے پی نڈا نے بھی اپوزیشن جماعتوں کے اتحاد انڈیا پر حملہ کرتے ہوئے کہا کہ سناتن دھرم کے تئیں نفرت کا سامان راہل گاندھی کی محبت کی دکان پر کیسے فروخت ہو رہا ہے۔ نڈا بی جے پی کی جن آشیرواد یاترا کو جھنڈی دکھانے کے لیے مدھیہ پردیش کے ستنا ضلع کے چترکٹ آئے تھے۔ اس دوران انہوں نے اپنے خطاب میں اپوزیشن کے تمام اتحاد کو آڑے ہاتھوں لیا۔ بی جے پی کے صدر نے کہا کہ جہاں وزیر اعظم نریندر مودی کی قیادت میں این ڈی اے اتحاد بھارت کو ترقی یافتہ بنا رہا ہے، وہیں خاندانی اتحاد انڈیا 'گھمنڈیا الائنس' کے سب سے بڑے رکن ڈی ایم کے لیڈر اور تمل ناڈو کے وزیر اعلی اسٹالن کے بیٹے ادے ندھی اسٹالن ہماری مذہبی رسومات اور ثقافت کو نقصان پہنچا رہے ہیں۔ ادے ندھی اسٹالن نے سناتن دھرم کو ختم کرنے کا اعلان کیا ہے۔

انہوں نے وہاں موجود لوگوں سے پوچھا کہ کیا ایسے ہندو مذہب پر اس طرح حملہ کرنے والے لوگوں کو رہنے دینے کا حق ہے؟ ادے ندھی اسٹالن نے سناتن دھرم کو جڑوں سے ختم کرنے کی بات کی ہے۔ وزیر اعلیٰ کے بیٹے نے مثال دی ہے کہ جس طرح مچھر، ملیریا، ڈینگی اور کورونا کا خاتمہ کرتے ہیں، اسی طرح سناتن دھرم کو ختم کر دو۔ اسی سلسلے میں نڈا نے اپوزیشن اتحاد پر سوال اٹھایا کہ ادے ندھی اسٹالن کا یہ بیان ایسے وقت میں آیا ہے جب ممبئی میں اس اتحاد کی حکمت عملی تیار کی جا رہی تھی۔ کیا یہ حکمت عملی تیار کی گئی ہے؟ کیا یہ اتحاد آنے والے انتخابات میں سناتن دھرم کو ختم کرنے کا مسئلہ لے کر عوام میں جانے والا ہے؟ انہوں نے کانگریس لیڈر گاندھی سے بھی سوال کیا کہ ان کی 'محبت کی دُکان' میں ہندو مذہب اور سناتن دھرم کے تئیں نفرت کیسے فروخت ہورہی ہے۔