Imran Khan Sypher Case سائفر کیس میں عمران خان کی عدالتی تحویل میں دو ہفتے کی توسیع

پاکستان کے سابق وزیر اعظم عمران خان، جن کی کل توشہ خانہ بدعنوانی کیس میں سزا معطل کر دی گئی تھی، کو ابھی بھی قید خانے میں رہنا پڑے گا کیونکہ ایک خصوصی عدالت نے سائفر کیس میں ان کی عدالتی تحویل میں 13 ستمبر تک کی توسیع کر دی ہے۔ عمران خان اس وقت پنجاب کی اٹک جیل میں قید ہیں۔

اسلام آباد:پاکستان کیایک خصوصی عدالت نے بدھ کو سائفر کیس میں پاکستان کے سابق وزیراعظم عمران خان کی عدالتی تحویل میں 13 ستمبر تک توسیع کر دی ہے۔ جج ابو الحسنات ذوالقرنین، جو پنجاب کی اٹک جیل میں سماعت کرنے پہنچے تھے، نے یہ فیصلہ گمشدہ سائفر کے معاملے میں جاری کیا۔ سائفر جو ایک خفیہ ریاستی دستاویز ہوتا ہے جس میں دو ممالک کے درمیان کوڈنگ ورڈز میں گفتگو کی جاتی ہے۔ گزشتہ سال عمران خان کو جب وزیراعظم کے عہدے سے برطرف کیا گیا تھا تو خان نے اسی سائفر کا ذکر کے یہ الزام عائد کیا تھا کہ ان کو اقتدار سے بے خال کرنے کے لیے بیرونی سازش رچی گئی ہے۔

وزارت داخلہ کی جانب سے سیکورٹی خدشات کا اظہار کیے جانے کے پیش نظر کیس کی سماعت اٹک ڈسٹرکٹ جیل میں وزارت قانون کی منظوری کے بعد ہوئی، جس میں حکام نے منگل کو کیس کی سماعت اٹک ڈسٹرکٹ جیل کے اندر کرنے کا فیصلہ کیا جہاں خان کو توشہ خانہ کیس میں سزا سنائے جانے کے بعد 5 اگست سے رکھا گیا تھا۔ واضح رہے کہ منگل کو اسلام آباد ہائی کورٹ کی دو رکنی بنچ نے عمران خان کی سزا کو معطل کر دیا تھا۔

لیکن انہیں جیل سے رہا نہیں کیا گیا تھا کیونکہ سائفر کیس کی سماعت کرنے والے جج نے انہیں جیل میں رکھنے اور سماعت کے لیے اگلے روز عدالت کے سامنے پیش کرنے کا حکم دیا تھا۔ جس کے بعد آج خصوصی عدالت کے جج ذو القرنین نے جیل میں ہی سائفر کیس کی سماعت کی اور عمران خان کے عدالتی تحویل میں 13 ستمبر تک توسیع کر دی، جس کا مطلب ہے کہ خان صاحب ابھی جیل میں ہی رہیں گے۔