ممبئی: انڈین انسٹی ٹیوٹ آف ٹیکنالوجی (آئی آئی ٹی بامبے) ممبئی میں ایک 18 سالہ طالب علم پوئی میں واقع انسٹی ٹیوٹ کے ہاسٹل کی ساتویں منزل سے چھلانگ لگا کر مبینہ خودکشی کرلی ہے۔ ذرائع کے مطابق طالب علم کی شناخت درشن سولنکی کے طور پر ہوئی ہے، جس کا تعلق ریاست گجرات کے احمد آباد سے ہے اور وہ آئی آئی ٹی میں کیمیکل انجینئرنگ کے پہلے سال میں زیر تعلیم تھا۔ پولیس کے مطابق طالب علم اتوار کی صبح 11:30 بجے ساتویں منزل سے گرا تھا۔
پولیس کو جائے حادثہ سے کوئی خودکشی نوٹ نہیں برآمد ہوا ہے۔ ساتھ ہی کچھ طلباء نے الزام لگایا ہے کہ کیمپس میں شیڈول کاسٹ کے طالب علم کے ساتھ مبینہ طور پر امتیازی سلوک کیا جا رہا تھا۔ جس کی وجہ سے اس نے خودکشی کا قدم اٹھایا۔ فی الحال پولیس نے حادثاتی موت کا معاملہ درج کرلیا ہے اور کیس کی تفتیش کی جا رہی ہے۔ پولیس نے بتایا کہ درشن سولنکی جو کہ بی ٹیک کا طالب علم تھا، احمد آباد کا رہنے والا تھا۔ اس نے تین ماہ قبل اس کورس میں داخلہ لیا تھا۔ہفتہ کو اس کے پہلے سمسٹر کے امتحانات ختم ہو گئے تھے۔ پوئی پولیس یہ جاننے کی کوشش کر رہی ہے کہ آیا طالب علم نے پڑھائی کے دباؤ میں اتنا سخت قدم اٹھایا۔
یہ بھی پڑھیں:
اے پی پی ایس سی (امبیڈکر پیریار پھولے اسٹڈی سرکل) آئی آئی ٹی بامبے نے ٹویٹ کیا "ہم 18 سالہ دلت طالب علم درشن سولنکی کی موت پر سوگوار ہیں۔ اس نے 3 ماہ قبل اپنے بی ٹیک کے لیے آئی آئی ٹی بامبے میں داخلہ لیا تھا۔ ہمیں سمجھنا چاہیے کہ یہ کوئی انفرادی یا نجی مسئلہ نہیں ہے بلکہ ایک ادارہ جاتی قتل ہے۔ ایک اور ٹویٹ میں کہا گیا "ہماری شکایات کے باوجود، انسٹی ٹیوٹ نے کیمپس کو دلت بہوجن آدیواسی طلباء کے لیے جامع اور محفوظ بنانے کی کوئی پرواہ نہیں کی۔ پہلے سال کے طلباء کو ریزرویشن مخالف جذبات اور غیر میرٹ کے طعنوں کے معاملے میں سب سے زیادہ ہراساں کیے جانے کا سامنا کرنا پڑتا ہے۔
امبیڈکر پیریار پھولے اسٹڈی سرکل نے ایک انسٹاگرام پوسٹ میں الزام لگایا ہے کہ "یہ کوئی ڈھکی چھپی حقیقت نہیں ہے کہ SC/ST کمیونٹی کے طلباء کو فیکلٹیوں اور عملے کی طرف سے کیمپس میں انتہائی ہراسانی اور امتیازی سلوک کا سامنا کرنا پڑتا ہے۔ ایس ایس پی بدھن ساونت نے کہا کہ ابتدائی معلومات کی بنیاد پر ہم نے حادثاتی موت کا معاملہ درج کیا ہے۔ معاملے کی جانچ کی جا رہی ہے۔ ان کا کہنا تھا کہ پہلی نظر سے ایسا معلوم ہوتا ہے کہ درشن ذہنی تناؤ کا شکار تھا۔ معاملے کی ہر زاویے سے جانچ کی جا رہی ہے۔ پولیس اس بات کا بھی پتہ لگا رہی ہے کہ آیا اس نے امتحان کی وجہ سے خودکشی کی ہے۔تاہم کوئی خودکشی نوٹ نہیں ملا ہے۔ اس لیے موت کی وجہ واضح نہیں ہو سکی۔
