حریت کے ایکزیکٹیو ممبران نے میر واعظ کی رہائی کا مطالبہ کیا

بیان میں کہا گیا کہ حریت ایکزیکٹیو اراکین نے حریت چیئرمین کے تئیں حکمران طبقے کے رویہ کو حد درجہ افسوسناک، مایوس کن اور قابل مذمت قرار دیتے ہوئے کہا کہ گزشتہ دو سالوں سے جناب میر واعظ کے تمام بشری اور نجی حقوق سلب کرلئے گئے ہیں جو ایک المیہ ہے۔

حریت کانفرنس نے ان کے چیئرمین میر واعظ عمر فاروق کی رہائی کا مطالبہ کرتے ہوئے کہا کہ بین الاقوامی انسانی حقوق کی تنظیموں اور جمہوری قدروں اور انصاف پر یقین رکھنے والے اداروں کو حریت چیئرمین کی رہائی کے ساتھ ساتھ جموں وکشمیر میں انسانی حقوق کی بحالی کے لئے فوری مؤثر اور کارگر اقدامات اٹھانے چاہئیں۔

حریت کے ایک بیان کے مطابق تنظیم کے ایکزیکٹیو ممبران پروفیسر عبدالغنی بٹ، بلال غنی لون اور مولوی مسرور عباس انصاری، میر واعظ عمر سے ان کی کووڈ سے صحت یابی کے بعد موصوف کی خیر و عافیت معلوم کرنے گئے تھے تو میر واعظ کے رہائشی گیٹ پر تعینات مسلح اہلکاروں نے انہیں روک دیا اور میر واعظ سے ملنے کی اجازت نہیں دی۔

یاد رہے کہ حریت چیئرمین میر واعظ مولوی محمد عمر فاروق پانچ اگست 2019 سے مسلسل گھر میں نظر بند ہیں۔

بیان میں کہا گیا کہ حریت چیئرمین کی رہائش گاہ کے گیٹ پر موبائل بنکر اور مسلح گاڑیاں سی آر پی ایف اور ریاستی پولیس اہلکاروں کی نگرانی میں کھڑی ہیں اور سڑک کو دونوں اطراف سے جزوی طور پر بلاک کردیا گیا ہے اور کسی بھی بیرونی شخص کو اندر جانے کی اجازت نہیں دی جارہی ہے۔

بیان میں کہا گیا کہ حریت ایکزیکٹیو اراکین نے حریت چیئرمین کے تئیں حکمران طبقے کے رویہ کو حد درجہ افسوسناک، مایوس کن اور قابل مذمت قرار دیتے ہوئے کہا کہ گزشتہ دو سالوں سے جناب میر واعظ کے تمام بشری اور نجی حقوق سلب کرلئے گئے ہیں جو ایک المیہ ہے۔

بیان میں واضح کیا گیا کہ حریت کانفرنس مسئلہ کشمیر کو عوامی امنگوں کے مطابق مستقل بنیادوں پر حل کرانے کے لیے اپنے اصولی موقف پر مضبوطی کے ساتھ قائم ہے بلکہ خطے میں دائمی امن و سلامتی کے قیام اور سیاسی استحکام کے لیے اس دیرینہ تنازعہ کا حل ناگزیر سمجھتے ہیں۔