بی جے پی کی اعلیٰ قیادت کی وجہ سے تیرتھ سنگھ راوت مذاق بن کر رہ گئے: ہریش راوت

کانگریس کے رہنما اور اتراکھنڈ کے سابق وزیراعلیٰ ہریش راوت نے تیرتھ سنگھ راوت کے وزیراعلیٰ کے عہدے سے استعفیٰ دینے پر کہا کہ بی جے پی نے دو اچھے آدمیوں کی مضحکہ خیز صورتحال بنا کر رکھ دی ہے۔

کانگریس کے رہنما اور اتراکھنڈ کے سابق وزیراعلیٰ ہریش راوت نے تیرتھ سنگھ راوت کے وزیراعلیٰ کے عہدے سے مستعفی ہونے پر ردعمل کا اظہار کرتے ہوئے کہا ہے کہ بی جے پی نے اپنے دو قائدین کی مضحکہ خیز حالت کردی ہے۔

ہریش راوت نے ٹویٹ کیا ہے کہ 2017 میں اقتدار میں آنے والی اتراکھنڈ بی جے پی نے اپنے دونوں رہنماؤں کی پوزیشن کو مضحکہ خیز بنا کر رکھ دیا ہے جبکہ دونوں اچھے آدمی ہیں۔ بجٹ اجلاس کے وسط میں تریویندر سنگھ راوت جی کو تبدیل کرنے کا فیصلہ کیا گیا، جبکہ محکمہ مالیات بھی انھیں کے پاس تھا اور بجٹ پر بحث و مباحثے کا جواب انھیں ہی دینا تھا اور بجٹ انھیں ہی منظور کروانا تھا۔

ہریش راوت نے کہا کہ جلد بازی میں بجٹ بھی منظور کیا گیا اور تریویندر سنگھ جی کو الوداع بھی کردیا گیا اور اس کے بعد تیرتھ سنگھ راوت کو وزیراعلیٰ بنایا گیا۔ جس کے بعد تیرتھ سنگھ جی کے مضحکہ خیز بیانات کی وجہ سے اور بی جے پی کی اعلیٰ قیادت کی جانب سے ان کے انتخابات کے سوال پر فیصلہ نہ لینے پر ان کو مذاق بنا کر چھوڑ دیا گیا۔

اتراکھنڈ کے سابق وزیراعلیٰ نے دعویٰ کیا کہ لوگ یہ کہہ رہے ہیں کہ جب ہمارے وزیراعلیٰ کو یہی علم نہیں تھا کہ کب انہیں الیکشن لڑ کر اسمبلی میں پہنچنا ہے تو پھر یہ شخص ہمارے ساتھ کیا فلاح کرے گا۔

واضح رہے کہ اتراکھنڈ کے وزیراعلیٰ تیرتھ سنگھ راوت نے اپنے عہدے سے استعفی دے دیا ہے۔ انہوں نے گذشتہ رات دیر تک گورنر بیبی رانی موریہ کو اپنا استعفیٰ پیش کیا تھا۔ تاہم اگلے وزیراعلیٰ کی تشکیل تک تیرتھ سنگھ راوت کارگزار وزیراعلیٰ رہیں گے۔ استعفی دینے کے بعد تیرتھ سنگھ راوت نے وزیر اعظم مودی ، وزیر داخلہ امت شاہ اور بی جے پی کے قومی صدر جے پی نڈا کا شکریہ ادا کیا۔