G20 Summit جی ٹوئنٹی سمٹ میں شرکت کے لیے یو اے ای اور ترک صدور کی دہلی آمد

بھارت کی صدارت میں ہونے والا دو روزہ جی ٹوئنٹی سربراہی اجلاس ہفتہ سے قومی دارالحکومت میں جدید ترین بھارت منڈپم میں شروع ہوگا۔ بھارت نے گزشتہ سال یکم دسمبر کو جی 20 کی صدارت سنبھالی تھی۔ یہ پہلا موقع ہے جب بھارت جی ٹوئنٹی سربراہی اجلاس کی میزبانی کر رہا ہے۔

نئی دہلی: متحدہ عرب امارات کے صدر محمد بن زید النہیان اور ترکیہ کے صدر رجب طیب اردوغان جی 20 سربراہی اجلاس سے قبل جمعہ کو نئی دہلی پہنچے۔ اردوغان کے ساتھ ان کی اہلیہ اور ترکیہ کی خاتون اول ایمن اردوغان بھی تھیں۔ اردوغان کا استقبال وزیر مملکت شانتنو ٹھاکر نے کیا، جبکہ یو اے ای صدر النہیان کا استقبال مرکزی وزیر مملکت برائے داخلہ امور نتیا نند رائے نے کیا۔میڈیا رپورٹ کے مطابق ترکیہ کے صدر رجب طیب اردوغان اجلاس میں روسی صدر ولادیمیر پوتن کے ساتھ اپنی حالیہ ملاقات کے نتائج پر تبادلہ خیال کریں گے۔ اردوغان اور پوتن نے پیر کو روسی سیاحتی شہر سوچی میں ملاقات کی تھی جس میں دیگر امور کے علاوہ بحیرہ اسود کے اناج کے اقدام کی حیثیت پر تبادلہ خیال کیا گیا تھا۔

سربراہی اجلاس میں شرکت کے لیے عالمی رہنماؤں کی آمد کا سلسلہ بھی جاری ہے۔ امریکی صدر جو بائیڈن، برطانوی وزیر اعظم رشی سنک، سعودی ولی عہد محمد بن سلمان، کینیڈا کے وزیر اعظم جسٹن ٹروڈو، یو اے ای کے صدر شیخ محمد بن زاید النہیان، ترکیہ کے صدر اردوغان اور جاپانی وزیر اعظم فومیو کشیدا ان اہم رہنماؤں میں شامل ہیں جو جی 20 سربراہی اجلاس میں شرکت کریں گے۔

خاص بات یہ ہے کہ چینی صدر شی جن پنگ، اسپین کے صدر پیڈرو سانچیز اور روس کے صدر ولادیمیر پوتن سربراہی اجلاس میں شرکت نہیں کریں گے۔ تاہم اجلاس میں چین کی نمائندگی چینی وزیر اعظم کریں گے اور روس کی نمائندگی روسی وزیر خارجہ سرگئی لاوروف کریں گے۔ اسپین کے صدر پیڈرو سانچیز کورونا سے متاثر ہونے کی وجہ سے بھارت نہیں آرہے ہیں۔

واضح رہے کہ رہے کہ G20 لیڈروں کا اجلاس 9، 10 ستمبر کو بھارت کی قومی دارالحکومت دہلی میں منعقد ہو رہا ہے جس کے پیش نظر دہلی کو شاندار طریقے سے سجایا گیا ہے۔ اس اجلاس میں 30 سے ​​زائد سربراہان مملکت اور یورپی یونین کے اعلیٰ حکام کے علاوہ 14 بین الاقوامی تنظیموں کے سربراہان کی شرکت متوقع ہے۔