نئی دہلی:من کی بات پروگرام میں وزیر اعظم نریندر مودی نے آنے والی نسل کو منشیات کے چنگل سے بچانے پر زور دیا اور کہا کہ اس کے لیے مشترکہ طور پر اور ہر سطح پر کوششیں کرنی ہوں گی۔ آل انڈیا ریڈیو پر اپنے ماہانہ ریڈیو پروگرام من کی بات کے 103 ویں ایڈیشن میں قوم سے خطاب کرتے ہوئے مودی نے کہا کہ سال 2020 سے ملک میں نشہ مکتی ابھیان جاری ہے۔ نوجوان اس میں بڑھ چڑھ کر حصہ لے رہے ہیں اور اسے کامیابی مل رہی ہے۔ جموں و کشمیر، پنجاب، چنڈی گڑھ اور مدھیہ پردیش میں نشہ مکتی ابھیان اور ان کی کامیابیوں کا تذکرہ کرتے ہوئے انہوں نے کہا کہ اس کے لیے سب کو مل کر کام کرنا ہوگا۔ انہوں نے کہا کہ جموں و کشمیر میں میوزیکل نائٹس، اونچی پہاڑیوں پر بائیک رائیڈس، چنڈی گڑھ میں مقامی کلب اور پنجاب میں اسپورٹس گروپس نشہ مکتی ابھیان کا نتیجہ ہیں۔ ان سے نوجوانوں کو منشیات کے چنگل سے بچانے میں مدد مل رہی ہے۔ یہ سرگرمیاں واقعی منشیات کے خلاف ایک مضبوط مہم ہیں۔
مودی نے کہا کہ منشیات کے خلاف مہم میں نوجوانوں کی بڑھتی ہوئی شرکت بہت حوصلہ افزا ہے۔ ان کوششوں سے ہندوستان میں منشیات کے خلاف مہم کو کافی تقویت ملتی ہے۔ اگر ہم ملک کی آنے والی نسلوں کو بچانا چاہتے ہیں تو انہیں منشیات سے دور رکھنا ہوگا۔ اسی سوچ کے ساتھ 15 اگست 2020 کو 'نشہ مکت بھارت ابھیان' کا آغاز کیا گیا۔ اس مہم سے 11 کروڑ سے زیادہ لوگ جڑے ہیں۔ دو ہفتے قبل ہندوستان نے منشیات کے خلاف بڑی کارروائی کی ہے۔ تقریباً 1.5 لاکھ کلو منشیات کی کھیپ پکڑنے کے بعد اسے تلف کر دیا گیا ہے۔ ہندوستان نے 10 لاکھ کلو منشیات تلف کرنے کا انوکھا ریکارڈ بھی بنالیا ہے۔ ان منشیات کی مالیت 12000 کروڑ روپے سے زیادہ تھی۔