توکتے طوفان کا خطرہ، کرناٹک کے چھ اضلاع میں 4 افراد ہلاک، 73 گاؤں متاثر

محکمہ موسمیات کے مطابق گردابی طوفان 'توکتے' منگل کی صبح گجرات کے ساحل کو عبور کرے گا۔ مزید اس بات کا بھی گمان ہے کہ یہ طوفان شدت اختیار کرسکتا ہے۔

محکمہ موسمیات کی جانب سے کیے گئے ایک ٹویٹ کے مطابق توکتے طوفان کا مرکز پنجیم گووا کے جنوب مغرب میں واقع ہے۔ یہ اندازہ لگایا جا رہا ہے کہ ' گجرات کے ساحل کو عبور کرتے وقت یہ طوفان پوربندر اور مہووا کے مابین 18 مئی تک پہنچ سکتا ہے'۔

آئی ایم ڈی نے ماہی گیروں کو یہ انتباہ جاری کیا ہے کہ 'ماہی گیر مشرق وسطی اور اس سے متصل جنوب مشرق بحیرہ عرب، کیرالہ کرناٹک، گوا، مہاراشٹر کے ساحلوں پر نہ جائیں۔

وہیں، اس تعلق سے وزیر اعظم نریندر مودی نے ہفتہ کے روز ایک اعلی سطحی اجلاس کی قیادت کی، جس میں صورتحال سے نمٹنے کے لئے ریاستوں اور مرکزی ایجنسیوں کی تیاریوں کا جائزہ لیا گیا۔

بھارتی فضائیہ (آئی اے ایف) نے 16 ٹرانسپورٹ طیارے اور 18 ہیلی کاپٹر کسی بھی تشویشناک صورتحال سے نمٹنے کے لیے تیار رکھے ہیں۔

نیشنل ڈیزاسٹر ریسپانس فورس (این ڈی آر ایف) کے عہدیداروں نے بتایا کہ 'کیرالہ، تمل ناڈو، کرناٹک، گجرات اور مہاراشٹر میں 50 سے زیادہ ٹیمیں تعینات کی گئی ہیں'۔