Keshub Mahindra Passed Away مہندرا اینڈ مہندرا کے سابق چیئرمین کیشو مہندرا کا انتقال

مہندرا اینڈ مہندرا کے چیئرمین کیشو مہندرا کا بدھ کو انتقال ہوگیا۔ ان کی عمر 99 برس تھی۔ مہندرا کی مجموعی مالیت کا تخمینہ 1.2 بلین ڈالر ہے۔

ممبئی:ملک کے سب سے پرانے ارب پتی اور مہندرا اینڈ مہندرا کے چیئرمین کیشو مہندرا کا بدھ کو انتقال ہوگیا۔ ان کی عمر 99 برس تھی۔ مہندرا کی مجموعی مالیت کا تخمینہ 1.2 بلین ڈالر ہے۔ چیئرمین کے طور پر اپنے 48 سال کے دور میں مہندرا گروپ نے آٹوموبائل مینوفیکچررز سے دوسرے کاروباری شعبوں جیسے انفارمیشن ٹیکنالوجی (آئی ٹی)، رئیل اسٹیٹ اور مالیاتی خدمات تک توسیع کی۔

مہندرا اینڈ مہندرا کے چیئرمین کیشو مہندرا پنسلوانیا یونیورسٹی یو ایس اے سے گریجویٹ تھے۔ انہوں نے 1947 میں کمپنی جوائن کی اور 1963 میں اس کے چیئرمین بنے۔ انہوں نے بڑی کمپنیوں جیسے ولیز کارپوریشن، مٹسوبشی، انٹرنیشنل ہارویسٹر، یونائیٹڈ ٹیکنالوجیز، برٹش ٹیلی کام وغیرہ کے ساتھ تجارتی معاہدے حاصل کرنے میں اہم کردار ادا کیا۔

کمپنی کی ویب سائٹ کے مطابق، 2004 سے 2010 تک، کیشو مہندرا کو سینٹرل انڈسٹری ایڈوائزری کونسل سمیت کئی کمیٹیوں میں تعینات کیا گیا تھا۔ وہ وزیر اعظم کی کونسل آف ٹریڈ اینڈ انڈسٹری، نئی دہلی کے رکن بھی تھے۔ انہوں نے اسٹیل اتھارٹی آف انڈیا لمیٹڈ (سیل)، ٹاٹا اسٹیل، ٹاٹا کیمیکلز، انڈین ہوٹلز، آئی ایف سی اور آئی سی آئی سی آئی سمیت مختلف کمپنیوں کے بورڈز اور کونسلوں میں بھی خدمات انجام دیں ہیں۔ حال ہی میں مہندرا کو فوربس میگزین کی 2023 کی فہرست میں شامل کیا گیا تھا۔ فوربس نے کہا کہ کیشو مہندرا سب سے عمر رسیدہ ہندوستانی ارب پتی ہیں۔

یو این آئی