آر ٹی او رامبن کی ٹرانسپورٹرز کے خلاف کارروائی

جموں و کشمیر کے ضلع رامبن میں ڈرائیوروں کی جانب سے من مانا کرایہ وصول کرنے کی کئی شکایات ملنے پر آر ٹی او رامبن شفقت مجید نے اپنی ٹیم کے ہمراہ جموں سرینگر قومی شاہراہ پر مختلف مقامات پر چیکنگ کا سلسلہ شروع کیا ہے۔

آر ٹی او رامبن شفقت مجید نے کہا کہ خلاف ورزی کرنے والے ڈرائیوروں پر جرمانہ عائد کیا جارہا ہے اور قانونی کارروائی بھی کی جارہی ہے۔

وہیں کورونا وبا کے پھیلاؤ کے مدنظر ٹرانسپورٹرز کو پچاس فیصد سواری بٹھانے کے احکامات کی خلاف ورزی کرنے والوں کے خلاف بھی اے آر ٹی او رامبن نے جرمانے کیے اور قانونی کارروائی بھی کی۔

اس کے علاوہ آر ٹی او رامبن نے تمام ڈرائیوروں سے اپیل کی کہ اس وبا سے نمٹنے کیلئے احکامات کی پاسداری کرے۔ انہوں نے مسافروں سے کہا کہ اگر کوئی بھی ڈرائیور مقررہ کرایہ سے زیادہ طلب کرے تو ان کے خلاف شکایت درج کروائی جائے۔