یوراج سنگھ کے خلاف ایف آئی آر درج

دراصل، یوراج سنگھ نے یوزویندر چہل کے خلاف 'ذات پات' کا لفظ استعمال کیا تھا، اس معاملے کے بڑھنے پر انہوں نے سوشل میڈیا پر بھی معذرت کرلی تھی۔

کرکٹر یوراج سنگھ پسماندہ طبقے کے خلاف دیے گئے تبصروں کے معاملے میں پھنستے ہوئے دکھائی دے رہے ہیں۔ عدالت کی مداخلت کے بعد ہریانہ (حصار) میں ہانسی پولیس نے ان کے خلاف مقدمہ درج کرلیا ہے۔

پولیس نے یوراج سنگھ کے خلاف ایس سی / ایس ٹی ایکٹ کے تحت مقدمہ درج کیا ہے۔ نیشنل الائنس اور دلت انسانی حقوق کے کنوینر رجت کلسن نے یوراج سنگھ کے خلاف مقدمہ درج کرایا ہے۔

رجت کلسن نے کہا کہ پولیس کو کرکٹر یوراج سنگھ کے خلاف مقدمہ درج کرنے میں آٹھ ماہ سے زیادہ کا عرصہ لگا۔ رجت کلسن نے یوراج سنگھ کے خلاف گذشتہ سال 2 جون کو پولیس کو شکایت کی تھی۔ پولیس نے مقدمہ درج نہیں کیا جس کے بعد وہ معاملہ عدالت میں لے کر گئے۔

کلسن نے پولیس کے خلاف وزیر داخلہ انل وج کو شکایت دی اور معاملہ عدالت میں لے گئے۔ شیڈیولڈ ذات اور قبیلہ کے مظالم سے بچاؤ ایکٹ، حصار کے تحت قائم خصوصی عدالت کے ایڈیشنل سیشن جج ویدپال سیروہی نے شکایت کنندہ کلسن کی درخواست پر سماعت کی جس کے بعد عدالت نے تفتیشی دو افسر ڈی ایس پی اور ہانسی سٹی تھانے کے اس وقت کے انچارج کے خلاف شیڈول ذات اور قبائل کے مظالم ایکٹ کے سیکشن 4 کے تحت تحقیقات کا حکم دیا۔

بعد میں نیشنل الائنس اور دلت انسانی حقوق کے کنوینر اور شکایت کنندہ رجت کلسن نے 11 جنوری کو عدالت میں ایک درخواست دائر کی تھی جس میں یہ الزام لگایا گیا تھا کہ 2 جون 2020 کو انہوں نے یوراج سنگھ کے خلاف ہانسی پولیس میں شکایت درج کی تھی اور یوراج سنگھ کے خلاف مقدمہ درج کر کے گرفتار کرنے کا مطالبہ کیا تھا، لیکن ہانسی پولیس نے کوئی مقدمہ درج نہیں کیا۔ کلسن کے مطابق نیشنل کمیشن برائے شیڈول ذات نے بھی ہانسی سپرنٹنڈنٹ پولیس کو مقدمہ درج کرنے کا حکم دیا تھا۔

یہ ہے پورا معاملہ

غور طلب ہے کہ ٹیم انڈیا کے اوپنر روہت شرما کے ساتھ یوراج سنگھ کی گفتگو (براہ راست انسٹا چیٹ) کی ویڈیو کلپ وائرل ہوئی تھی، جس میں انہوں نے نسل پرستانہ مبینہ تبصرہ کیا تھا۔ جس کے بعد رجت کلسن نے 2 جون کو پولیس کو اس معاملے میں شکایت دی تھی۔ ایس پی لوکیندر سنگھ نے اس معاملے کی تحقیقات ڈی ایس پی روہتاش سنگھ کو سونپی، لیکن گزشتہ دنوں ڈی ایس پی کا تبادلہ بروالا کردیا گیا۔ فی الحال ڈی ایس پی ونود شنکر کو تحقیقات کی ذمہ داری سونپی گئی ہے۔

یوراج نے معافی مانگی تھی

الزام ہے کہ ان سب کے بعد بھی پولیس نے یوراج سنگھ کے خلاف کوئی مقدمہ درج نہیں کیا۔ در اصل، یوراج سنگھ نے یوزویندر چہل کے خلاف ذات پات کا لفظ استعمال کیا تھا، اس معاملے کے بڑھنے پر انہوں نے سوشل میڈیا پر بھی معذرت کرلی تھی جس میں یوراج سنگھ نے کہا تھا کہ 'میں یہ واضح کرنا چاہتا ہوں کہ میں رنگ، ذات، نسل کی بنیاد پر کسی بھی امتیازی سلوک پر یقین نہیں رکھتا۔ میں نے اپنی زندگی لوگوں کی بھلائی کے لئے گزاری ہے اور میں اس طرح اور بھی زندہ رہنا چاہتا ہوں۔ میں ہر شخص کا احترام کرتا ہوں۔ میں اپنے دوستوں سے بات کر رہا تھا اور اس وقت میری بات کو غلط طریقے سے لیا گیا تھا، جو غیر منصفانہ تھا۔'

یوراج نے کہا تھا کہ 'ایک ذمہ دار ہندوستانی کی حیثیت سے میں یہ کہنا چاہتا ہوں کہ اگر نادانستہ طور پر کسی کو میری باتوں سے چوٹ پہنچی ہے تو مجھے افسوس ہے'۔