جموں و کشمیر کے سانبہ ضلع میں جگن ناتھ مندر کے احاطے میں شری بل یوگیشور داس مہاراج کے زیر اہتمام 39 ویں اتی مہا وشنو یگیا میں نیشنل کانفرنس کے صدر فاروق عبداللہ شامل ہوئے اور ملک کی سلامتی اور خوش حالی کے لئے دعا مانگی۔
فاروق عبداللہ کے بعد، وزیر اعظم کے دفتر میں وزیر مملکت ڈاکٹر جتیندر سنگھ نے بھی پنڈال کا دورہ کیا اور دعا میں شرکت کی، جس میں ملک کے لیے اپنی جانیں قربان کرنے والے سیکورٹی اہلکاروں کے 100 سے زیادہ خاندان کے افراد نے بھی شرکت کی۔ 11 روزہ 'مہا وشنو یگیا' 26 جنوری کو شروع ہوا تھا اور ہلاک شدہ اہلکاروں کے قریبی رشتہ داروں کی سہولت کے لیے وسیع و عریض کمپلیکس کے اندر کل 108 'ہون کنڈ' بنائے گئے تھے۔
اس موقع پر فاروق عبداللہ نے نامہ نگاروں کو بتایا کہ گرو جی شہیدوں کے خاندانوں کے درد کو کم کرنے میں بہت اچھا کام کر رہے ہیں۔ حکومت خاندانوں کو مالی مدد فراہم کر سکتی ہے، لیکن ان کے درد کو صرف مذہبی رہنما ہی دور کر سکتے ہیں۔ مہاراج کے کردار کی تعریف کرتے ہوئے، این سی لیڈر، جو جموں صوبے کے صدر رتن لال گپتا سمیت پارٹی کے سینئر لیڈروں کے ہمراہ تھے، نے کہا کہ یہ تقریب مذہبی بصیرت فراہم کرتی ہے اور نیکی کا احساس دلاتی ہے۔
یہ بھی پڑھیں: Farooq Abdullah On Opposition Unity اپوزیشن کے اتحاد سے ہی ملک میں تبدیلی آسکتی ہے، ڈاکٹر فاروق عبداللہ
فاروق عبداللہ نے کہا کہ ہمیں امن اور بھائی چارہ برقرار رکھنا ہے کیونکہ ہمارا اتحاد ہی ہندوستان کی طاقت ہے۔ انہوں نے کہا کہ گروجی بغیر کسی تفریق کے سب سے پیار کرتے ہیں اور ہمیں اپنے ملک کو محبت کا گھر بنانے کے لیے حقیقی معنوں میں ان کی پیروی کرنے کی ضرورت ہے۔
