کرنال میں کسانوں پر ہوئی لاٹھی چارج پر کسان رہنماؤں کا سخت ردعمل

کرنال کے ٹول پلازہ پر پولیس کی جانب سے کسانوں پر ہوئی لاٹھی چارج کے خلاف ریاست اترپردیش کے رامپور میں اپنے سخت ردعمل کا اظہار کرتے ہوئے کسان رہنما رادھے شیام نے کہا کہ بی جے پی والی کھٹر حکومت کی پولیس نے بربریت کا مظاہرہ کرکے جلیاں والا باغ سانحہ کی یاد کو تازہ کردیا۔

زراعت سے متعلق نئے زرعی قوانین کے خلاف احتجاج کرنے والے کسانوں پر کرنال کے ٹول پلازہ پر پولیس کے ذریعہ کی گئی لاٹھی چارج پر رامپور کے کسانوں میں زبردست غصہ دکھائی دے رہا ہے۔ رامپور کے ٹول پلازہ پر دھرنے پر بیٹھے بھارتی کسان یونین کے رہنما رادھے شیام نے اپنے سخت ردعمل کا اظہار کیا۔

انہوں نے کہا کہ حکومت کسانوں کے استحصال پر اتری ہوئی ہے اور جس طرح سے ہریانہ میں پولیس سے لاٹھی چارج کرائی گئی ہے حکومت کو اس کے سخت نتائج بھگتنا پڑیں گے۔

کسان رہنما نے کہا کہ ہم حکومت کی کسان مخالف پالیسوں مذمت کرتے ہیں۔ ساتھ ہی انہوں نے یہ بھی کہا کہ بی جے پی حکومت کی پولیس نے کسانوں پر لاٹھی چارج کرکے جلیاں والا باغ سانحہ کی یادوں کو تازہ کردیا ہے۔

انہوں نے کہا کہ جس طرح مجاہدین آزادی نے انگریزوں سے اس ملک کو آزاد کرایا تھا اب وقت آگیا ہے کہ ایک مرتبہ پھر انگریزوں کی راہ پر چلنے والی بی جے پی حکومت کو ملک سے اکھاڑ پھینک کر آزادی حاصل کی جائے۔

بتادیں کہ پولیس لاٹھی چارج سے پہلے سوشل میڈیا پر ایک ویڈو وائرل ہوئی تھی، جس میں کرنال کے ایس ڈی ایم آیوش سنہا پولیس کو احکامات دیتے دکھائی دے رہے ہیں کہ 'ایک بھی بندہ یہاں سے جانا نہیں چاہئے اور اگر جائے تو سر پھٹے بغیر نہیں جائے۔'

یہی وجہ ہے کہ پولیس کی جانب سے ایسی لاٹھی چارج کی گئی کہ متعدد کسان بری طرح زخمی ہوگئے۔ جس کے بعد ملک بھر میں کسانوں میں زبردست غصہ نظر آرہا ہے۔