تریپورہ میں ہوئے فرقہ وارانہ تشدد پر وکلاء کی فیکٹ فائنڈنگ رپورٹ

تریپورہ میں مسلمانوں کے ساتھ ہوئے تشدد پر فیکٹ فائنڈنگ رپورٹ تیار کرنے کے لیے وکلاء کی ایک ٹیم روانہ ہوئی تھی، جس نے آج دہلی کے پریس کلب آف انڈیا میں پریس کانفرنس کرکے تریپورہ کی رپورٹ پیش کی۔

اس رپورٹ کے مطابق تریپورہ کی 12 مساجد کو نقصان پہنچا ہے جبکہ متعدد دکانیں اور گھروں کو بھی نقصان پہنچایا گیا ہے۔ اس رپورٹ کے مطابق پورے معاملے میں سخت گیر ہندو تنظیموں نے ہی مسلمانوں کے خلاف تریپورہ میں ماحول پیدا کیا جس کے بعد بھیڑ نے اقلیتی برادری کو تشدد کا نشانہ بنایا۔

پریس کانفرنس کے دوران احتشام ہاشمی نے تریپورہ تشدد واقعے کی سخت مذمت کی اور کہا کہ تریپورہ میں اب تک حالات خراب ہیں۔ وہاں پر مساجد، گھروں اور دکانوں کو نذرآتش کیا گیا۔

انہوں نے مزید کہا کہ تریپورہ میں ایک ہفتے تک منصوبہ بند طریقے سے مسلمانوں پر حملے کیے گئے، وہاں پر درجنوں مسلمانوں کی عبادت گاہوں کو نقصان پہنچایا گیا۔ قرآن شریف کی بے حرمتی کی گئی لیکن اس کے باوجود پولیس نے ان کے خلاف کوئی کارروائی نہیں کی۔ انہوں نے ملزمان کے خلاف سخت کاروائی کا مطالبہ کرتے ہوئے کہا کہ ملزمان کو گرفتار کرکے جیل میں ڈالا جائے۔

ایڈووکیٹ انصار اندوری نے بتایا کہ اس فساد سے چار روز قبل وہاں کے مسلمانوں نے انتظامیہ کو آگاہ کیا تھا کہ اگر اس ریلی کو نہیں روکا گیا تو علاقے میں فساد ہوسکتا ہے اور وہی ہوا۔ مگر انتظامیہ نے اس فساد کو روکنے کے لئے کسی بھی طرح سے کوئی قدم نہیں اٹھایا۔ یہ فساد پوری طرح سے منصوبہ بند طریقے سے ہوا۔

انہوں نے یہ بھی کہا کہ وہاں پر مسجدوں کو شہید کیا گیا، ہم نے وہاں جاکر حالات کا جائزہ لیا اور ہماری رپورٹ کے مطابق وہاں 12 مساجد کو نقصان پہنچا ہے لیکن ابھی بھی پولیس کا کہنا ہے کہ کسی بھی مسجد میں توڑ پھوڑ نہیں کی گئی۔

تریپورہ میں ہوئے فرقہ وارانہ تشدد پر وکلاء کی فیکٹ فائنڈنگ رپورٹ

پریس کلب آف انڈیا میں سپریم کورٹ کے ایڈووکیٹ احتشام ہاشمی، ایڈووکیٹ این ڈی پنچولی ایڈووکیٹ امت شری واستو، مکیش کمار، ایڈووکیٹ انصار اندوری سمیت دیگر وکلاء شامل رہے۔