شمالی کشمیر کے ضلع بارہمولہ کے قصبہ سوپور میں سیکیورٹی فورسز اور عسکریت پسندوں کے درمیان تصادم میں تین عسکریت پسند ہلاک کئے گئے ہیں۔ ابھی تک ان کی شناخت نہیں ہو پائی ہے۔ پولیس کے مطابق آپریشن ختم ہو چکا ہے اور جائے تصادم سے گولہ بارود برآمد کیا گیا ہے۔
اطلاعات کے مطابق سوپور قصبہ کے پیٹھ سیر علاقہ میں یہ انکاؤنٹر منگل کی شب شروع ہوا۔ علاقہ میں دو سے تین عسکریت پسندوں کے چھپے ہونے کی اطلاع تھی۔
سوپور انکاؤنٹر: ایک عسکریت پسند ہلاک انتظامیہ نے احتیاط کے طور پر سرینگر - بارہمولہ ٹرین سروس اور موبائل انٹرنیٹ خدمات بند کر دی ہیں۔
ذرائع کے مطابق گذشتہ شب آرمی، سی آر پی ایف اور جموں و کشمیر پولیس نے مذکورہ علاقہ میں بڑے پیمانے پر تلاشی کارروائی شروع کی تھی۔ سیکیورٹی فورسز اہلکار جب ایک مخصوص مقام کی جانب پیش قدمی کرنے لگے تو وہاں چھپے عسکریت پسندوں نے ان پر فائرنگ کی، جس کے ساتھ ہی تصادم شروع ہو گیا۔ جس میں دو عسکریت پسند ہلاک ہو گئے۔
یہ بھی پڑھیں: سرینگر میں انکاؤنٹر، 2 عسکریت پسند ہلاک
واضح رہے کہ اس سے قبل گذشتہ روز جموں و کشمیر کے گرمائی دارالحکومت سرینگر کے آلوچی باغ میں عسکریت پسندوں اور سکیورٹی فورسز کے درمیان انکاؤنٹر میں دو عسکریت پسند ہلاک ہوئے تھے۔
پولیس کے مطابق ممنوعہ تنظیم لشکر طیبہ اور ٹی آر ایف کے ٹاپ کمانڈر عباس شیخ اور ان کا ساتھی ثاقب منظور انکاؤنٹر میں ہلاک ہوئے، جو پولیس کے لیے ایک بڑی کامیابی ہے۔
