کولگام میں نماز عیدالفطر سادگی سے ادا کی گئی

جموں و کشمیر کے ضلع کولگام اور اطراف کے قصبہ جات اور گاؤں میں نماز عید الفطر نہایت ہی سادگی سے ادا کی گئی۔

کورونا وائرس وبا کے پیش نظر ضلع میں مکمل لاک ڈاؤن نافذ کیا گیا ہے جبکہ معمول کا ٹرانپسورٹ اور کاروباری سرگرمیاں بھی بند تھیں۔ ضلع کی تمام مساجد میں ایس او پیز کے مطابق نماز عید ادا کی گئی۔

متعدد افراد نے گھروں میں ہی نماز عید ادا کی۔ علماء کرام نے لوگوں سے گھروں میں رہنے کی اپیل کی اور وبا سے بچاؤ کے تعلق سے اقدامات کرنے پر زور دیا۔

ضلع میں مکمل لاک ڈاون کی وجہ سے عید الفطر کی تقریبات نہایت سادگی سے منائی گئی۔ اس دوران بچوں نے بھی عید کے تہوار کو دھوم دھام سے منانے کے بجائے گھروں میں ہی منانے کو ترجیح دی۔

بچوں کے مطابق کورونا وائرس کی تباہ کاری نے ان کی امیدوں پر پانی پھیر دیا اور انہوں نے اس بار بھی عید کو گھروں میں اپنے اہل خانہ کے ساتھ منایا۔