Special ASEAN India FM Meeting: آج کے دور میں آسیان کا کردار زیادہ اہم ہے، وزیر خارجہ ایس جے شنکر

وزیر خارجہ ایس جے شنکر نے ہند آسیان وزرائے خارجہ کی خصوصی میٹنگ Special ASEAN India FM Meeting میں کہا کہ یوکرین میں پیش رفت کے بعد پیدا ہونے والی جغرافیائی سیاسی صورتحال کی وجہ سے یہ راستہ مزید مشکل ہوگیا ہے۔ موجودہ جغرافیائی سیاسی چیلنجز اور عالمی غیر یقینی صورتحال کے درمیان آج آسیان کا کردار پہلے سے کہیں زیادہ اہم ہے۔

نئی دہلی: بھارت نے جمعرات کو آسیان ممالک کے ساتھ اپنی اسٹریٹجک شراکت داری کو ڈی سینٹرلائزڈ گلوبلائزیشن اور پائیدارو قابل بھروسہ سپلائی چین کو یقینی بنانے کے لیے اہم قرار دیا اور اس کے لیے موجودہ حالات کے مطابق نئی ترجیحات طے کرنے اور ان کے جلد نفاذ پر زور دیا۔ وزیر خارجہ ایس جے شنکر نے آج یہاں آسیان انڈیا وزرائے خارجہ کی خصوصی میٹنگ Special ASEAN India FM Meeting کی شریک صدارت کرتے ہوئے اپنے ابتدائی کلمات میں کہا کہ اگرچہ کووڈ وبا ابھی مکمل طور پر ختم نہیں ہوئی ہے، لیکن کووڈ کے بعد کی بحالی کی کوششوں کے تحت کئی مسائل پر بات کرنے کی ضرورت ہے۔

بشکریہ ٹویٹر

ڈاکٹر جے شنکر نے کہا کہ یوکرین میں پیش رفت کے بعد پیدا ہونے والی جغرافیائی سیاسی صورتحال کی وجہ سے یہ راستہ مزید مشکل ہوگیا ہے۔ خوراک اور توانائی کے تحفظ کے ساتھ ساتھ کھادوں اور ضروری اشیاء کی قیمتیں متاثر ہو رہی ہیں، لاجسٹکس اور سپلائی چین میں خلل پڑ رہا ہے۔ انہوں نے کہا کہ آسیان علاقائیت، کثیرالجہتی اور عالمگیریت کے حق میں ہمیشہ پرچم بردار رہا ہے۔ آسیان نے ہندوستانی بحرالکاہل میں اسٹریٹجک اقتصادی ڈھانچہ کی مضبوط بنیاد رکھنے میں کامیابی حاصل کی ہے۔ موجودہ جغرافیائی سیاسی چیلنجوں اور عالمی غیر یقینی صورتحال کے درمیان آج آسیان کا کردار پہلے سے کہیں زیادہ اہم ہے۔ ہندوستان ایک مضبوط، متحد اور خوشحال آسیان اور ہند-بحرالکاہل خطے میں اس کے مرکزی کردار کی مکمل حمایت کرتا ہے۔

ڈاکٹر جے شنکر نے کہا، "آج، موجودہ عالمی غیر یقینی صورتحال کے درمیان، ہم اپنے 30 سالہ سفر کا جائزہ لے رہے ہیں اور آنے والی دہائیوں کے لیے راہیں ترتیب دے رہے ہیں۔ ایسی صورتحال میں یہ بھی ضروری ہے کہ ہم موجودہ اقدامات کو تیزی سے مکمل کریں اور نئی ترجیحات کا تعین کریں۔ انہوں نے امید ظاہر کی کہ بھارت-آسیان، اپنے تعلقات کے چوتھے عشرے میں، باہمی طور پر بہترکنیکٹوٹی کے ساتھ ڈی سینٹرلائزڈ گلوبلائزیشن اور پائیدار و قابل اعتماد سپلائی چین کو یقینی بنانے کے لیے تیار ہیں جو بین الاقوامی برادری کی سب سے بڑی ضرورت ہے۔ (یو این آئی)