وادیٔ کشمیر میں آوارہ کتوں کی تعداد اس قدر بڑھ گئی ہے کہ ہر سال پانچ ہزار شہریوں کو کتوں کے حملوں کا شکار ہونا پڑتا ہے۔ گزشتہ برس مارچ سے رواں برس کے اپریل مہینے تک شہر سرینگر میں پانچ ہزار سے زائد شہریوں کو کتوں نے کاٹ لیا، جن میں کئی شدید طور پر زخمی ہوگئے ہیں۔ اب عام شہریوں کے ساتھ ساتھ سیاح بھی ان حملوں کا شکار ہورہے ہیں۔ شہریوں کا کہنا ہے کہ شہر میں باہر نکلنا محال ہوگیا ہے۔ Fear Of Stray Dogs In Jammu and Kashmir
گورنمنٹ میڈیکل کالج سرینگر کے متعلقہ افسران کے مطابق گزشتہ ایک دہائی کے دوران ساٹھ ہزار افراد کو کتوں نے کاٹا ہے۔ ماہرین کا کہنا ہے کہ جب تک بڑی تعداد میں کتوں کی نس بندی نہیں کی جائے گی تب تک لوگ اس کا شکار ہوتے رہیں گے۔ سرینگر اور دیگر قصبوں میں سائنسی طریقہ کے ناقص انتظامات کتوں کی آبادی میں اضافے کا سبب ہے۔ اگرچہ عام لوگوں کی شکایتیں اور دباؤ کی وجہ سے انتظامیہ نے چند برس قبل آوارہ کتوں کی نس بندی شروع کی تھی تاہم سست رفتاری کے باعث یہ جدید طریقہ بے سود ثابت ہو رہا ہے۔
سرینگر میونسپل کارپوریشن کشمیر میں واحد ادارہ ہے جس نے آوارہ کتوں کی نس بندی کا سلسلہ شروع کیا ہے، جب کہ وادی کے نو اضلاع میں انتظامیہ کے پاس اس طرح کا کوئی نظام موجود نہیں ہے۔ سرینگر میونسپل کارپوریشن ہر ماہ 15 کتوں کی نس بندی کرتی ہے، جو آبادی کے لحاظ سے آٹے میں نمک کے برابر ہے۔ ایس ایم سی کے ڈپٹی میئر پرویز احمد قادری نے ای ٹی وی بھارت کو بتایا کہ انتظامیہ کے پاس نس بندی ہی واحد طریقہ ہے کیونکہ دیگر تدابیر پر عدالت کی طرف سے پابندی ہے۔