Divorced Muslim Woman Maintenance طلاق شدہ مسلم خواتین دوبارہ شادی تک نان و نفقہ کی حقدار، الٰہ آباد ہائی کورٹ

الٰہ آباد ہائی کورٹ نے سیشن کورٹ کے فیصلے پر روک لگاتے ہوئے طلاق شدہ مسلم خاتون کے سابق شوہر کو حکم دیا ہے کہ وہ اپنی سابقہ ​​بیوی کو اس وقت تک نان و نفقہ ادا کرے جب تک کہ وہ دوبارہ شادی نہ کر لے۔ Divorced Muslim woman maintenance

لکھنؤ: الہ آباد ہائی کورٹ نے بدھ کے روز فیصلہ سنایا کہ طلاق شدہ مسلم خواتین اپنے سابق ​​شوہر سے اپنی بقیہ زندگی گزارنے کے لیے کفالت حاصل کرنے کی حقدار ہیں جب تک کہ وہ دوبارہ شادی نہ کرلیں۔ عدالت نے مسلم خواتین (Protection of Rights on Divorce) ایکٹ 1986 کی دفعہ 3 کا حوالہ دیتے ہوئے کہا کہ نان و نفقہ کی ادائیگی صرف عدت تک محدود نہیں ہے۔ مطلقہ کے عدت کی مدت تین ماہ اور 13 دن ہوتی ہے۔Divorced Muslim woman maintenance

الہ آباد ہائی کورٹ غازی پور کی فیملی کورٹ کے فیصلے کے خلاف زاہدہ خاتون کی طرف سے دائر کی گئی درخواست پر فیصلہ سنایا، جس فیملی کورٹ کے فیصلے میں کہا گیا تھا کہ وہ صرف عدت کے لیے اپنے سابقہ ​​شوہر سے کفالت کی حقدار ہے۔ جسٹس سوریہ پرکاش کیسروانی اور جسٹس محمد اظہر حسین ادریسی پر مشتمل بنچ ایک مسلم خاتون زاہدہ خاتون سے متعلق کیس کی سماعت کر رہی تھی جسے شادی کے 11 سال بعد 2000 میں اس کے شوہر نورالحق نے طلاق دے دی تھی۔

الہ آباد ہائی کورٹ کی بنچ نے کہا، حقائق اور قانونی حیثیت سے، ہمیں یہ کہنے میں کوئی ہچکچاہٹ نہیں ہے کہ فیملی کورٹ کی پرنسپل جج، نے قانون کی ایک صریح غلطی کا ارتکاب کیا ہے کہ اپیل کنندہ صرف عدت کی مدت تک ہی نان و نفقہ کی حقدار ہے۔ بنچ نے مشاہدہ کیا کہ فیملی کورٹ نے دانیال لطیفی اور یونین آف انڈیا کے 2001 کے کیس میں سپریم کورٹ کے فیصلے کو پڑھنے اور سمجھنے میں غلطی کی ہے۔

سپریم کورٹ کے اس فیصلے میں کہا گیا ہے کہ ایک مسلمان شوہر طلاق شدہ خاتون کے مستقبل کے لیے منصفانہ اور معقول بندوبست کرنے کا ذمہ دار ہے، جس میں واضح طور پر اس کے نان و نفقہ کا بندوبست شامل ہے۔ یہ شرط عدت کی مدت کے بعد بھی لاگو ہوتی ہے۔