کورونا وائرس وبا پر قابو پانے کے لیے اگرچہ ملک بھر میں آکسیجن کی قلت پائی جارہی ہے جس کے سبب ہر ضلع میں ضلع انتظامیہ نے مختلف ہسپتالوں میں آکسیجن پلانٹ قائم کروائے ہیں۔
کورونا کے پیش نظر ضلع ہسپتال شوپیان کی نئی عمارت کو کووڈ ہسپتال میں تبدیل کیا گیا ہے۔ یہاں کچھ روز قبل ہی کووڈ مثبت مریضوں کے لئے 1000 لیٹر پر منٹ (ایل پی ایم) آکسیجن پلانٹ کا افتتاح کیا گیا تھا۔
ڈویژنل کمشنر کشمیر کا دورہ شوپیان اسی آکسیجن پلانٹ کا معائنہ کرنے کے لئے آج ڈیویزنل کمشنر کشمیر نے آکسیجن پلانٹ کا مزید جائزہ لیا۔اس موقع پر انہوں نے شعبہ صحت کے ملازمین پر زور دیا کہ وہ اس آکسیجن پلانٹ کے ذریعہ متاثرہ مریضوں کو بہتر سہولیات پہنچانے میں اپنا کلیدی رول ادا کریں۔
اس کے علاوہ ڈیویزنل کمشنر نے منی سکریٹریٹ آرہامہ شوپیان کا بھی دورہ کیا جہاں انہوں نے کووڈ 19 کنٹرول کا جائزہ لیا۔اس موقع پر انہوں نے بتایا کہ شوپیان ضلع میں 45 سال سے زائد عمر کے 97 فیصد لوگوں نے کووڈ ویکسین لے لی ہے جو بہت ہی اچھی بات ہے۔
اسی وجہ سے ضلع میں کووڈ 19 کے مثبت کیس بہت ہی کم ہیں انہوں نے کہا کہ ضلع شوپیان میں کووڈ 19 کی دوسری لہر میں ابھی تک چار لوگوں کی موت ہوئی ہے جنہوں نے کورونا وائرس کا ٹیکہ نہیں لگایا تھا۔
اس موقع پر ان کے ہمراہ ضلع ترقیاتی کمشنر شوپیان سچن کمار، ڈائریکٹر ہیلتھ مشتاق احمد ، چیف میڈیکل افسر شوپیان ارشد حسین ٹاک، ایس ایس پی شوپیان امرت پال سنگھ، نوڈل آفسر کووڈ 19 جاہد آزاد ، تحصیلدار شوپیان بلال احمد اور دیگر کئی اعلیٰ افسران بھی موجود تھے۔
