قومی دار الحکومت دہلی کے نومنتخب آل انڈیا مجلس اتحاد المسلمین کے ریاستی صدر کلیم الحفیظ نے اے آئی ایم آئی ایم دہلی انچارج اور اورنگ آباد کے رکن پارلیمان امتیاز جلیل سے ساؤتھ ایوینیو میں ان کے آفس پر ملاقات کی اور دہلی میں پارٹی کو مضبوط کرنے جیسے کئی امور پر تبادلہ خیال کیا۔
امتیاز جلیل کے ساتھ چلی کئی گھنٹے کی میٹنگ میں دہلی کی کمیٹی کی تشکیل، آنے والے کارپوریشن کے الیکشن اور دہلی میں مجلس کی توسیع اور استحکام پر تفصیل سے گفتگو کی۔ اس موقع پر کافی غور وخوض کے بعد بلیغ الزماں نعمانی کو مجلس کا جنرل سکریٹری مقرر کیا گیا۔
قابل ذکر ہے کہ مہاراشٹر اور بہار میں عوام کی ملی حمایت کے بعد آل انڈیا مجلس اتحاد المسلمین نے ملک بھر میں سرگرم ہونے کا فیصلہ کیا ہے۔ گزشتہ دنوں حیدرآباد میں مقامی اکائی کے الیکشن میں شاندار کارکردگی کے بعد اے آئی ایم آئی ایم نے اب دہلی میں بھی پارٹی کو مضبوطی دینے کی جانب کام کرنا شروع کردیا ہے۔
اسی کے تحت اے آئی ایم آئی ایم کے سربراہ بیرسٹر و رکن پارلیمان اسد الدین اویسی نے سماجی کارکن اور تاجر کلیم الحفیظ کو دہلی کی ذمہ داری سونپی ہے۔ کلیم الحفیظ آئندہ سال ہونے والے دہلی میونسپل کارپوریشن انتخابات کو لے کر سرگرم ہوگئے ہیں تاکہ عین الیکشن سے قبل تنظیم کو مضبوطی کے ساتھ کھڑا کرسکیں۔ واضح رہے کہ کلیم الحفیظ کی دہلی کی صدارت سنبھالنے کے بعد امتیاز جلیل سے یہ پہلی ملاقات تھی۔
