دہلی کی پٹیالہ ہاؤس کورٹ نے اے آئی ایم آئی ایم رکن پارلیمنٹ اسد الدین اویسی کی دہلی رہائش گاہ میں توڑ پھوڑ کے الزام میں گرفتار ملزم للت کو ایک دن کی پولیس تحویل میں بھیج دیا ہے۔ میٹرو پولیٹن مجسٹریٹ امردیپ کور نے باقی چار ملزمان کو 14 دن کے لیے عدالتی تحویل میں بھیجنے کا حکم دیا۔
دہلی پولیس نے ویڈیو کانفرنسنگ کے ذریعے ان ملزمان کو عدالت میں پیش کرنے کا مطالبہ کیا تھا جسے عدالت نے قبول کرلیا۔ دہلی پولیس نے کہا کہ اگر ملزم کو عدالت میں پیش کیا جائے تو بہت زیادہ ہجوم جمع ہوسکتا ہے۔ اس کے بعد دہلی پولیس نے پانچوں ملزمان کو ویڈیو کانفرنسنگ کے ذریعے پیش کیا۔
جانچ افسر اکھلیشور نے ملزم للت کی ایک دن کی پولیس تحویل کا مطالبہ کیا۔ انہوں نے کہا کہ جرم میں استعمال ہونے والی کلہاڑی ملزم سے برآمد کرنی ہے۔ پولیس للت سے پوچھ گچھ کرنا چاہتی ہے تاکہ پوری سازش کا پتہ چل سکے۔ ملزم کی جانب سے پیش ہونے والے وکیل ششی رنجن کمار نے اس کی مخالفت کی۔