Congress Protest: دہلی میں جن جاگرن مہم کے تحت کانگریس کا احتجاج

بی جے پی اور عام آدمی پارٹی کی ناکامیوں کو اجاگر کرنے کے لیے دہلی ریاستی کانگریس کارکنان نے آدرش نگر میں جن جاگرن مہم کی شروعات کی۔ اس موقع پر کانگریس رہنماؤں نے مرکزی اور دہلی حکومت کی سخت تنقید کی۔ مظاہرہ میں کافی تعداد میں کانگریسی کارکنان نے شرکت کی۔

دہلی پردیش کانگریس کے صدر انل چودھری نے کارکنان سے خطاب کرتے ہوئے کہا کہ کانگریس پارٹی نے دہلی کو عالمی سطح کی راجدھانی بنایا لیکن آج دہلی میں حکومت کررہی عام آدمی پارٹی اور ایم سی ڈی میں قابض بی جے پی نے دہلی کی ترقی کو برباد کر دیا ہے۔ انہوں نے ان دونوں پارٹیوں کی ناکامیوں کو گناتے ہوئے کہا کہ ان دونوں پارٹیوں نے صرف عوام کو گمراہ کرنے کا کام کیا ہے۔

انہوں نے کہا کہ دہلی میں ہر طبقات کا استحصال ہو رہا ہے۔ خواتین کے تحفظ کا کوئی انتظام نہیں ہے، مزدوروں کا استحصال جاری ہے، پسماندہ طبقات کو کوئی پوچھنے والا نہیں ہے۔

انہوں نے کہا کہ مودی اور کیجریوال حکومت کہتی ہے کہ لوگوں کی مزدوری بڑھی ہے لیکن زمینی حقیقت یہ ہے کہ جب مزدوروں سے پوچھتے ہیں تو وہ کہتے ہیں کہ مزدوری چار سو روپے ملتی ہے لیکن مہنگائی کہیں اس سے زیادہ بڑھ گئی ہے۔

انہوں نے کہا کہ گیس سلینڈر ہزار روپے کے قریب پہنچ گیا ہے، سبزیوں کی قیمت آسمان چھو رہی ہے لیکن ان حکومتوں کو عوام کی فکر نہیں ہے اور ان لوگوں کی اپنی پبلیسٹی جاری ہے۔ اس موقع پر کانگریس کے سینئر کارکنان نے بھی خطاب کیا۔