کانگریس جموں و کشمیر میں جلدی انتخابات کے حق میں: سریندر سنگھ چنی

جموں و کشمیر میں اسمبلی انتخابات کا مطالبہ کرتے ہوئے کانگریس نے کہا ہے کہ عوامی حکومت کا کوئی متبادل نہیں ہو سکتا ہے۔ بیوروکریسی میں عوامی رسائی نہیں ہوتی ہے۔ ای ٹی وی بھارت کے ساتھ ایک خصوصی انٹرویو میں کانگریس کے سینئر لیڈر اور جنرل سیکرٹری سریندر سنگھ چنی نے بتایا کہ کانگریس انتخابات کے لیے تیار ہے۔

سریندر سنگھ چنی نے بتایا کہ ملک کے عوام کو اب بی جے پی کے کھوکھلے نعروں کا پتہ چل گیا ہے اور یہ جماعت اب مزید عوام کو بے وقوف نہیں بنا سکتی ہے۔ حال ہی میں ہماچل کے اندر بی جے پی کی جو شکست ہوئی ہے، اسے یہ بات صاف ہو رہی ہے کہ اب عوام نے اپنا موڈ تبدیل کر دیا ہے اور آنے والے وقت میں کانگریس ایک بار پھر بہتر کارکردگی کا مظاہرہ کرے گی۔

جہاں تک جموں وکشمیر میں کانگریس کا تعلق ہے تو یہاں کے عوام کو کانگریس کے علاوہ کوئی آپشن نہیں ہے کیونکہ نیشنل کانفرنس اور پی ڈی پی نے پہلے ہی بی جے پی کو گلے لگا کر اپنے عزائم دکھا دیے ہیں اور ہماری جماعت ہی ایسی واحد جماعت ہے جو بی جے پی کے ساتھ اتحاد نہیں کر سکتی ہے۔

غلام نبی آزاد کی قیادت میں یہاں انتخاب لڑنے کے بارے ميں انھوں نے بتایا کہ غلام نبی آزاد ملکی سطح کے ایک جانے مانے سیاستدان ہیں اور وہ ہر وقت کانگریس کی طرف سے جموں وکشمیر کے انتخابات میں پیش پیش رہے ہیں۔ کانگریس ہائی کمان فیصلہ کرے گی کہ آنے والے اسمبلی انتخابات کس کی قیادت میں لڑے جائیں تاہم یہ بات طے ہے کہ کانگریس اب کی بار جموں وکشمیر میں بہتر کارکردگی کا مظاہرہ کرے گی۔