فلائنگ سکھ Flying Sikh کے نام سے مشہور ملکھا سنگھ Milkha Singh ایک ماہ تک کورونا انفیکشن corona infection سے لڑنے کے بعد جمعہ کے روز انتقال کرگئے۔
ملکھا سنگھ کے انتقال پر صدر جمہوریہ رام ناتھ کووند نے ٹوئٹ کرتے ہوئے ملکھا سنگھ کے انتقال پر غم کا اظہار کیا اور ان کے اہل خانہ و مداحوں سے تعزیت کی۔
رام ناتھ کووند نے مزید لکھا کہ 'ملکھا سنگھ کی جدوجہد اور مضبوط کردار کی کہانی بھارتیوں کو مسلسل متاثر کرتی رہے گی۔
وزیر اعظم نریندر مودی نے ملکھا سنگھ کے انتقال پر تعزیت کرتے ہوئے کہا کہ 'بھارت نے ایک ایسا عظیم کھلاڑی کھو دیا ہے جس نے بھارتیوں کے دلوں میں ایک خاص مقام بنالیا تھا۔'
وزیر اعظم نے مزید لکھا کہ 'میں نے کچھ دن پہلے ملکھا سنگھ جی سے بات کی تھی۔ مجھے نہیں معلوم تھا کہ 'یہ ہماری آخری بات ہوگی۔'
وہیں وزیر داخلہ امت شاہ نے ملکھا سنگھ کے انتقال پر تعزیت کرتے ہوئے لکھا کہ 'قوم ملکھا سنگھ کو ہمیشہ بھارتی کھیلوں کے ایک روشن ستارے کے طور پر یاد رکھے گی۔
مرکزی وزیر کھیل کیرن رجیجو نے غم کا اظہار کیا اور ٹوئٹ کرتے ہوئے لکھا کہ 'ملکھا سنگھ جی میں آپ سے وعدہ کرتا ہوں کہ ہم آپ کی آخری خواہش کو پورا کریں گے۔'