برڈ فلو: مرکز نے متعدد ریاستوں کو رہنماء خطوط جاری کیا

کورونا وبائی مرض کے بحران کے درمیان برڈ فلو بھی کئی ریاستوں میں پھیل گیا ہے۔حکومت فلو سے متاثرہ ریاستوں میں اس سے بچاؤ کے لئے کوششیں کر رہی ہے۔ متعدد ریاستوں میں ملٹی ڈسپلنری ٹیمیں تعینات کی گئیں ہیں۔

مرکزی وزارت صحت نے برڈ فلو سے متاثرہ ریاست کیرالہ کے ضلع علاپوزہ اور کوٹئیم اور ہریانہ کے ضلع پنچکولہ میں کثیر الشعبہ ٹیمیں متعین کی ہیں۔وزارت نے اپنے ایک بیان میں کہا کہ محکمہ اینیمل ہسبنڈری نے پیر کے روز کیرالہ کے علاپوزہ اور کوئیٹیم میں بطخوں کے نمونوں میں برڈ فلو (ایچ 5 این 8) کے انفیکشن کی تصدیق کی تھی۔اسی طرح پنچکولہ سے بھی مرغیوں کے نمونوں میں بھی انفیکشن کی رپورٹ موصول ہوئی تھی۔

نیشنل سنٹر فار ڈیزیز کنٹرول (این سی ڈی سی) ، نیشنل انسٹی ٹیوٹ آف ویرولوجی ، پی جییمر چنڈی گڑھ، دہلی کے آر ایم ایل اسپتال اور لیڈی ہارڈنگ میڈیکل کالج کے ماہرین کی دو ملٹی ڈسپلنری ٹیموں کو متاثرہ اضلاع میں چار جنوری سے تعینات کردیا گیا ہے۔ یہ ٹیم برڈ فلو کے انفیکشن کے پھیلاؤ کو روکنے کے لیے وزارت صحت کی حکمت عملی کو نافذ کرنے میں ریاستوں کے محمکہ صحت کی مدد کرے گی۔

مرکزی وزارت فشریز ،ڈیری اور مویشی پروری کے محکمہ نے بتایا کہ کیرالہ ، راجستھان ، مدھیہ پردیش اور ہماچل پردیش میں 12 مقامات پر برڈ فلو پھیلنے کی اطلاعات موصول ہوئی ہیں۔جس کے بعد پولٹری کے پرندوں، کوؤں اور ہجرت کرنے والے پرندوں میں انفیکشن کے پھیلاؤ کو روکنے کے لیے رہنماء خطوط جاری کردئیے گئے ہیں۔

برڈ فلو کے نئے معاملے اس لیے بھی پریشان کن ہیں، کیونکہ کچھ ماہ قبل یعنی 30 ستمبر 2020 کو بھارت نے خود کو اس بیماری سے پاک قرار دیا تھا۔ بھارت میں برڈ فلو کا پہلا کیس 2006 میں سامنے آیا تھا

کیرالہ

کیرالہ کے مویشی پروری کے وزیر کے راجو نے کہا کہ علاپوزہ اور کوئٹیم ضلع میں برڈ فلو کے ایچ 5 ایچ 8 جیسے انفیکشن کو پھیلنے سے روکنے کے لیے بطخوں اور مرغے مرغیوں سمیت 69 ہزار سے زائد پرندوں کو ہلاک کردیا گیا ہے۔

ہماچل

برڈ فلو کی دہشت کے درمیان ہماچل پردیش کے سولن ضلع میں بدرھ کے روز قومی شاہراہ کے قریب 500 مرغیاں مردہ پائی گئی ہیں۔

ہماچل پردیش نے ضلع کانگڑا میں نمبھومی کے اطراف میں موجود علاقوں میں 28 دسمبر کے بعد قریب 3 ہزار ہجرت کرنے والے پرندوں کی موت کے مدنظر مرغیوں کے نمونے جانچ کے لیے بھیجے گئے ہیں۔اس درمیان سولن ضلع میں قومی شاہراہ کے قریب 500 مرغیاں مردہ پائی گئی ہیں۔حالانکہ یہ بات نہیں معلوم ہوسکا کہ کس نے ان مردہ مرغیوں کو پھینکا ہے۔حکام نے بتایا کہ مردہ مرغیوں کے نمونے اکٹھے کیے گئے ہیں۔

راجستھان

راجستھان کےضلع سوائی مادھوپور میں بدھ کے روز پرندوں میں انفیکشن سے متاثر پائے جانے کے بعد ریاست کے پانچ ضلع میں برڈ فلو کے پھیلاؤ کی خبریں سامنے آئی۔محکمہ مویشی پروری کے مطابق بدھ کے روز ریاست میں 410 اور پرندوں کی موت ہونے سے ریاست میں اب تک پرندوں کی موت کا کل اعداد و شمار 1458 پہنچ گیا ہے۔جودھپور ضلع کے سیتراوا ور فلودی علاقے میں بدھ کے روز تقریبا 50 کوئے مردہ پائے گئے تھے۔

ہریانہ

ہریانہ کے پنچکولہ میں پولٹری مراکز میں ان پرندوں کی غیرقدرتی موت کے واقعات کی اطلاع ملی ہے۔ ہم نے ریاستی حکومت سے چوکس رہنے اور نمونے بھیجنے کے لئے کہا ہے۔

مہاراشٹر

مہاراشٹر کے ٹھانے شہر میں واقع ہاؤسنگ کمپلیکس میں بدھ کے روز مشکوک حالات میں 15 بگولے مردہ پائے گئے۔ میونسپل کارپوریشن کے عہدیدار نے یہ اطلاع دی۔

مدھیہ پردیش

مدھیہ پردیش نے احتیاطی تدابیر کے طور پر اگلے 10 دن کے لئے جنوبی ریاستوں سے کسی بھی قسم کی پولٹری پرندوں کے داخلے پر پابندی عائد کردی ہے۔ مدھیہ پردیش کے ویٹرنری ڈیپارٹمنٹ کے ڈپٹی ڈائریکٹر پرمود شرما نے بتایا کہ پچھلے آٹھ دنوں کے دوران ہمیں رہائشی علاقوں کے ارد گرد 155 کوئے مردہ پائے گئے تھے۔ ہمیں لگتا ہے کہ ان کی موت بھی برڈ فلو کے ایچ 5 این 8 وائرس کی وجہ سے ہوئی ہے، کیونکہ اس علاقے میں مردہ کووں میں اس مرض کی تصدیق ہوچکی ہے۔

انہوں نے بتایا کہ شہر میں اب تک کوے کے علاوہ کسی بھی دیگر پرندوں کے اقسام میں برڈ فلو کے ایچ 5 این 8 وائرس کا انفیکشن نہیں ملا ہے۔

پنجاب

پنجاب میں برڈ فلو کا کوئی معاملہ پیش نہیں آیا ہے، لیکن حکومت نے حکام کو ہدایت دیا ہے کہ ریاست میں کسی بھی ہجرت کرنے والے پرندوں اور پولٹری پرندوں کی غیر قدرتی موت پر نظر رکھیں اور ان کے نمونوں کو جانچ کے لیے بھیجیں۔چندی گڑھ کے سکھنا جھیل اور آس پاس کے علاقوں سے چار مردہ پرندے ملے ہیں۔ چندی گڑھ کے محکمہ جنگلات نے بتایا کہ وہ معلوم کر رہے ہیں کہ کہیں اور پرندوں کی موت تو نہیں ہوئی ہے۔