All Party Meeting پارلیمنٹ کے خصوصی اجلاس سے قبل حکومت نے آل پارٹی میٹنگ طلب کی

پارلیمانی امور کی وزارت نے پارلیمنٹ کے خصوصی اجلاس سے قبل اتوار یعنی 17 ستمبر 2023 کو پارلیمنٹ ہاوس میں آل پارٹی میٹنگ طلب کی ہے۔ پارلیمنٹ کا اجلاس 18 ستمبر سے 22 ستمبر 2023 تک ہونے والا ہے۔ اپوزیشن جماعتوں کے رہنماؤں کے مطالبے کے باوجود حکومت نے ابھی تک خصوصی اجلاس کا کوئی ایجنڈا جاری نہیں کیا ہے۔ جس پر کانگریس برہم ہے۔

نئی دہلی: حکومت نے پارلیمنٹ کے خصوصی اجلاس سے قبل اتوار کو آل پارٹی میٹنگ بلائی ہے۔ پارلیمنٹ کا خصوصی اجلاس 18 سے 22 ستمبر تک ہوگا اور اس دوران پانچ اجلاس ہوں گے۔ وزارت پارلیمانی امور نے بدھ کو ایک بیان جاری کرتے ہوئے کہا کہ وزیر پارلیمانی امور نے پیر سے شروع ہونے والے خصوصی اجلاس کے لیے تمام سیاسی جماعتوں کے رہنماؤں کا اجلاس بلایا ہے۔ قابل ذکر ہے کہ اپوزیشن جماعتوں کے رہنماؤں کے مطالبے کے باوجود حکومت نے ابھی تک خصوصی اجلاس کا کوئی ایجنڈا جاری نہیں کیا ہے۔

اپوزیشن جماعتوں کی جانب سے کانگریس پارلیمانی پارٹی کی لیڈر سونیا گاندھی نے وزیر اعظم نریندر مودی کو خط لکھ کر خصوصی اجلاس کے ایجنڈے کو عام کرنے کا مطالبہ کیا تھا۔ اپوزیشن کی جانب سے انہوں نے مہنگائی، بے روزگاری، کسان، ہنڈن برگ رپورٹ، خواتین پر مظالم جیسے مسائل کی فہرست بھیجی تھی اور کہا تھا کہ اپوزیشن پارٹیاں پارلیمنٹ میں ان مسائل پر بحث کرنا چاہتی ہیں۔

وہیں کانگریس نے خصوصی اجلاس کے ایجنڈے کے بارے میں ابھی تک کوئی معلومات نہ ہونے پر مودی حکومت پر سوال کھڑے کیے ہیں۔ کانگریس جنرل سکریٹری جئے رام رمیش نے کہا کہ ایک شخص کے علاوہ کسی کو پارلیمنٹ کے ایجنڈے کی خبر نہیں ہے۔ اس سے پہلے جب بھی کوئی خصوصی اجلاس بلایا گیا تو ہر کوئی اس کے ایجنڈے سے واقف تھا۔

ٹی ایم سی لیڈر ڈیرک اوبرائن نے کہا کہ جب کہ پارلیمنٹ کے خصوصی اجلاس میں زیادہ دن نہیں ہے پھر بھی کسی کو اندازہ تک نہیں ہے کہ ہم وہاں کن موضوعات پر بات کریں گے۔ اوبرائن نے کہا کہ کوئی ایجنڈا اچانک مسلط نہیں ہونا چاہیے، اس پر جامع بات چیت ہونی چاہیے۔ ٹی ایم سی لیڈر نے کہا کہ صرف دو لوگ ہی اس ایجنڈے کے بارے میں جانتے ہیں! اور ہم آج بھی خود کو پارلیمانی جمہوریت کہتے ہیں۔