Excise Policy Case شراب بدعنوانی معاملہ مکمل طور پر فرضی اور گندی سیاست سے متاثر ہے: کیجریوال

اتوار کو پہلی بار سی بی آئی نے دہلی شراب بدعنوانی معاملہ میں وزیراعلی اروند کیجریوال سے پوچھ گچھ کی۔ اس دوران انہوں نے 56 سوالات کے جوابات دیئے۔ پوچھ گچھ کے بعد کیجریوال نے کہا کہ یہ سارا معاملہ مکمل طور پر جھوٹا اور فرضی ہے۔ CBI asked to Kejriwal about 56 questions

نئی دہلی: دہلی کے وزیر اعلی اروند کیجریوال نے کہا کہ شراب بدعنوانی معاملہ پوری طرح سے فرضی ہے اور گندی سیاست سے متاثر ہے اور اس لئے مرکزی تفتیشی بیورو (سی بی آئی) کے پاس کوئی ثبوت نہیں ہے۔ کیجریوال سی بی آئی ہیڈکوارٹر میں تقریباً نو گھنٹے تک پوچھ گچھ کے بعد واپس آئے اور اپنی رہائش گاہ پر صحافیوں سے بات چیت کی۔انہوں نے سی بی آئی افسران کے اچھے رویے کے لیے شکریہ ادا کرتے ہوئے کہا کہ یہ سارا معاملہ مکمل طور پر جھوٹا اور من گھڑت ہے۔ یہ صرف گندی سیاست سے متاثر ہے۔ سی بی آئی کے پاس کوئی ثبوت نہیں ہے۔ عام آدمی پارٹی ایک خالص ایماندار پارٹی ہے۔ ہم مر جائیں گے لیکن اپنی ایمانداری پر سمجھوتہ نہیں کریں گے۔ انہوں نے کہا کہ عآپ پورے ملک میں تیزی سے پھیل رہی ہے۔ دہلی اور پنجاب میں ہماری حکومتیں ہیں اور اب ایک قومی پارٹی بھی بن چکی ہے۔ اس لیے یہ لوگ ہمیں بدنام کر کے عآپ کو ختم کرنا چاہتے ہیں۔

انہوں نے کہا کہ عآپ پورے ملک میں بہت تیزی سے پھیل رہی ہے۔ پہلے دہلی میں حکومت بنی، پھر پنجاب میں حکومت بنی، اب عام آدمی پارٹی نیشنل پارٹی بن چکی ہے۔ عآپ جگہ جگہ جا رہی ہے اور لوگوں کی امیدوں پر کھری اتر رہی ہے۔ یہ لوگ عام آدمی پارٹی کو ختم کرنا چاہتے ہیں، لیکن اب ایسا نہیں ہو سکتا کیونکہ پورے ملک کے عوام ہمارے ساتھ ہیں۔

انہوں نے کہا کہ سی بی آئی نے ان سے کئی سوالات کئے۔ مثلاً شراب کی پالیسی کہاں سے شروع ہوئی، کیسے ہوئی اور اس سے متعلق آخر تک تمام سوالات پوچھے۔ سال 2020 سے اب تک جو کچھ ہوا اس پر تقریباً 56 سوالات پوچھے گئے۔ انہوں نے کہا کہ میرا ماننا ہے کہ یہ سارا کیس فرضی ہے۔ ان کے پاس کوئی ثبوت نہیں ہے کہ یہ کہہ سکیں کہ عام آدمی پارٹی اور ہماری حکومت نے کچھ غلط کیا ہے۔ انہوں نے کہا کہ عام آدمی پارٹی کے لوگ آواز اٹھا رہے تھے، پرامن احتجاج کر رہے تھے، اس کے باوجود انہیں گرفتار کر لیا گیا۔ یہ بالکل غلط ہے۔ پرامن احتجاج ہمارا حق ہے، وہ کسی کے ساتھ کچھ غلط نہیں کر رہے تھے۔ وزیر اعلیٰ نے کہا کہ کل اسمبلی میں ایوان کی کارروائی یقینی طور پر چلے گی۔ اگر لیفٹیننٹ گورنر کہہ رہے ہیں کہ یہ غلط ہے تو وہ بتائیں کہ یہ کس اصول کی بنیاد پر غلط ہے۔ جب کابینہ نے قرارداد منظور کی تو اس میں ایل جی سے پوچھنے کی کوئی ضرورت نہیں ہے۔

یو این آئی