مغربی بنگال کے دارالحکومت کولکاتا سے متصل ہوڑہ ضلع کے شیب پور تھانہ کے تحت قاضی پاڑہ بستی میں نامعلوم افراد کے حملے میں کلکتہ ہائی کورٹ کے وکیل اور ایک شخص زخمی ہوگیا.
کلکتہ ہائی کورٹ کے وکیل پر سرعام جان لیو حملے کے بعد پورے علاقے میں سنسنی پھیل گئی. پولیس نے اس معاملے میں دو لوگوں کو گرفتار کر لیا ہے.
ذرائع کے مطابق قاضی پاڑہ بستی کی ایک چائے دکان میں بیٹھے وکیل تنویر عالم پر نامعلوم افراد نے تیز دھار ہتھیار سے حملہ کر دیا.
وکیل کو شرپسندوں کے حملے سے بچانے کی کوشش میں ایک دیگر شخص بھی زخمی ہو گیا. پولیس نے جائے وقوع پر پہنچ کر حالات کو قابو میں کیا. زخمیوں کو مقامی اسپتال میں داخل کرایا گیا.
شیب پور تھانے کی ہولیس کے مطابق تنویر عالم کلکتہ ہائی کورٹ کے وکیل ہیں. پورے معاملے کی تفتیش کی جا رہی ہے. اس معاملے میں شیخ راجو اور شیخ صدام کو گرفتار کرلیا گیا ہے.
یہ بھی پڑھیں:
پولیس نے مزید کہا کہ پورے معاملے کی تفتیش کی جا رہی ہے. اس معاملے میں مزید لوگوں کی گرفتاری عمل میں آ سکتی ہے.
دوسری طرف زخمی وکیل کے رشتہ دار سید حبیب الرحمن نے کہا کہ آج دن میں تنویر عالم اپنا چمبر بند کرکے قاضی پاڑہ گئے تھے. تھوڑی دیر بعد ہی ان پرجان لیوا حملے کی اطلاع ملی.
انہوں نے کہا کہ وہ علاقے میں منچلے نوجوانوں اور شرپسندوں کے خلاف مہم چلا رہے تھے. اسی وجہ سے ان پر جان لیوا حملہ کیا گیا ہے.
کلکتہ ہائی کورٹ کے وکیل وجیندر پرتاپ سنگھ نے کہا کہ تنویر عالم شیب پور علاقے میں بدمعاشوں کے خلاف سرگرم مہم چلاتے ہیں. علاقے میں تبدیلی لانا چاہتے ہیں. لیکن انہیں یہ پتہ نہیں تھاکہ تبدیلی لانے کی کوشش کی وجہ سے انہوں نے کتنے لوگوں کو اپنا دشمن بنا چکے ہیں.
انہوں نے کہا کہ شیب پور تھانے کی پولیس کو وکیل تنویر عالم پر حملہ کرنے والے شرپسندوں کے خلاف کارروائی کرنی چاہیے تاکہ دوسرے اس طرح کی حرکت کرنے سے پہلے دو بار سوچنے پر مجبور ہو جائیں.
