Pakistani in Indian Territory نادانستہ طور پر بھارتی حدود میں داخل ہونے والے دو پاکستانی شہری پاک فوج کے حوالے

بی ایس ایف نے لائن آف کنٹرول عبور کرکے بھارت میں داخل ہونے والے دو پاکستانی شہری کو پاک فوج کے حوالے کردیا۔ پوچھ تاچھ کے دوران ان دونوں نے اعتراف کیا کہ راستہ بھٹکنے کی وجہ سے وہ غلطی سے بھارتی حدود میں داخل ہوگئے۔

چندی گڑھ: بارڈر سیکیورٹی فورس (بی ایس ایف) نے دو پاکستانی شہریوں کو پاکستانی فوج کے حوالے کر دیا جو نادانستہ طور پر بین الاقوامی سرحد عبور کر کے بھارت میں داخل ہو گئے تھے۔ بی ایس ایف نے منگل کو ایک بیان میں یہ معلومات فراہم کی۔ بیان کے مطابق فورس کے اہلکاروں نے پیر کو دو پاکستانی شہری، سبیب خان (25) اور محمد چاند (21) کو پنجاب کے ضلع ترن تارن کے نوشہرہ ڈھلہ گاؤں کے قریب بھارتی علاقے میں داخل ہونے کے بعد گرفتار کیا تھا۔ انہوں نے بتایا کہ پوچھ تاچھ کے دوران معلوم ہوا کہ دونوں نے نادانستہ طور پر سرحد پار کی تھی۔

ایک بیان کے مطابق دونوں پاکستانی شہریوں کے پاس کچھ ذاتی سامان اور ایک ہزار روپے کی پاکستانی کرنسی کے علاوہ کوئی قابل اعتراض چیز نہیں تھی، جس کے بعد بی ایس ایف نے پاکستانی رینجرز سے رابطہ کیا اور اس سلسلے میں اپنا احتجاج بھی درج کرایا۔ بیان میں کہا گیا ہے کہ دونوں پاکستانی شہریوں کو منگل کی دیر رات تقریباً ایک بجے پاکستانی رینجرز کے حوالے کیا گیا۔

دراندازی کی روک تھام کا پروٹوکول کیا ہے؟بارڈر سیکورٹی فورس نے کہا کہ ہم دراندازی کو روکنے کے لیے ایک پروٹوکول پر عمل کرتے ہیں۔ جب بھی ہم سرحد کے قریب کوئی سرگرمی دیکھتے ہیں تو سب سے پہلے آواز لگاتے ہیں، اگر ہماری آواز پر سامنے والا شخص رک جائے اور ہم سے بات کرے تو ہم اس کی جانچ اور پوچھ تاچھ کے بعد پاکستانی رینجرز کے حوالے کر دیتے ہیں۔ لیکن اگر کوئی ہماری آواز پر نہیں رکتا ہے اور ہمارے سوالوں کا جواب نہیں دیتا ہے تو ہم اسے رکنے کی وارننگ دیتے ہیں۔ اس کے بعد بھی اگر وہ شخص بھاگنے کی کوشش کرتا ہے تو پھر ہم اس پر فائرنگ کر دیتے ہیں۔