پاکستان سے دراندازی کی کوشش کرنے والا شخص گرفتار

بارڈر سکیورٹی فورس (بی ایس ایف) کے دستوں نے منگل کی شام ایک دراندازی کی کوشش کو ناکام بنا دیا اور پاکستان سے دراندازی کی کوشش کرنے والے ایک شخص کو گرفتار کیا ہے۔

عہدیداروں نے بتایا کہ بی ایس ایف کے جوانوں نے سامبہ سیکٹر کے قریب بھارتی سرحد میں دراندازی کی کوشش کرنے والے پر فائرنگ کر دی جس کے نتیجے میں اسے گولی لگ گئی۔

سامبہ وجئے پور اسپتال کے میڈیکل آفیسر ڈاکٹر چندر موہن نے بتایا کہ 'بی ایس ایف کے جوانوں کی فائرنگ میں ایک پاکستانی درانداز زخمی ہوگیا۔ وہ سامبہ سیکٹر میں بین الاقوامی سرحد کے قریب آیا تھا۔ اسے ہسپتال لایا گیا ہے۔'

انہوں نے بتایا کہ 'زخمی شخص کا نام آصف ہے اور اس کا تعلق پاکستان کے لاہور سے ہے۔ بہتر علاج کے لئے اسے جموں کے ہسپتال ریفر کیا گیا ہے۔'