یوگی حکومت بسوں کی اجازت دے

کانگریس کی جنرل سکرٹیری پرینکا گاندھی واڈرا نے کہا کہ لاک ڈاؤن کے سبب مصائب و آلام برداشت کرتے ہوئے شدید گرمی میں پیدل چلنے والے مزدوروں کو احترام کے ساتھ گھر بھیجنے کی ذمہ داری سب کی ہے لہٰذا اترپردیش حکومت کو نوئیڈا اور غازی آباد سرحد پر کھڑی بسوں سے مہاجر مزدوروں کو لے جانے کی فوراً اجازت دینی چاہیے۔

پرینکا واڈرا نے کہا کہ ان کی پارٹی کے کارکنان نے ڈیڑھ ہزار سے زائد بسوں کا انتظام مہاجر مزدوروں کو ان کے گھروں تک پہنچانے کے لیے کیا ہے اور تمام بسیں غازی آباد اور نوئیڈا بارڈر پر کھڑی ہیں۔ مزدوروں کے مفاد میں اترپردیش حکومت کو ان بسوں کے چلائے جانے کی اجازت دینی چاہیے۔

انہوں نے کہا کہ ریاست کے وزیر اعلیٰ یوگی آدتیہ ناتھ سے اجازت ملنے کے بعد 17 مئی کو 500 بسیں اور 19 مئی کو 900 بسیں نوئیڈا، غازی آباد میں کھڑی ہیں لیکن حکومت ان بسوں کو مزدوروں کو لے کر جانے کی اجازت نہیں دے رہی ہے۔

محترمہ واڈرا نے کہا کہ اس مسئلے پر سیاست نہیں ہونی چاہیے اور ان بسوں کو چلنے دیا جانا چاہیے۔ ان کا کہنا تھا کہ اگر اجازت مل گئی ہوتی تو اب تک 90 ہزار سے زائد افراد اپنے گھروں کو پہنچ گئے ہوتے۔

انہوں نے کہا کہ اب تک کانگریس 67 لاکھ مہاجر مزدوروں کو ان کے گھروں تک پہنچا چکی ہے جن میں سے 60 لاکھ محض اترپردیش کے ہیں۔