کانگریس پارٹی کا نیا صدر کون؟

عام انتخابات میں کانگریس پارٹی کو ملی شکست فاش کے بعد پارٹی کے صدر راہل گاندھی نے استعفے کی پیش کش کی تھی جسے کانگریس ورکنگ کمیٹی نے قبول کرنے سے انکار کر دیا تھا۔

اطلاعات کے مطابق کانگریس پارٹی کے صدر راہل گاندھی استعفے کے لیے بضد ہیں۔ الغرض چار دنوں کے اندر کانگریس ورکنگ کمیٹی کی میٹنگ دوبارہ منعقد ہونے والی ہے۔

واضح رہے کہ یہ میٹنگ راہل گاندھی کو اپنے اسعتفے پر غور کرنے کی گزارش کا آخری موقع ہوگا۔ اس لیے کہ پارٹی کے بہت سے رہنماؤں کی رائے ہے کہ راہل گاندھی صدر کے عہدے پر بنے رہیں۔

اگر راہل گاندھی اپنی ضد پر قائم رہے تو اسی میٹنگ میں نئے صدر کے اعلان کی امید ہے۔

اب دیکھنا یہ ہے کہ کانگریس پارٹی کے صدر کی کرسی پر پھر کوئی گاندھی یا نہرو خاندان کا شخص ہوتا ہے یا کوئی اور؟

کانگریس پارٹی کے سینئیر رہنما احمد پٹیل اور کے سی وینو گوپال نے راہل گاندھی سے ملاقات کی ہے۔

سنہ 2014 کے انتخابات کے بعد سے ہی کانگریس پارٹی خستہ حالی کی شکار ہے۔ گزشتہ انتخابات میں کانگریس کو صرف 44 نشستیں ملی تھیں جبکہ اس دفعہ صرف 52 نشستوں پر کامیابی حاصل کی ہے۔

غور طلب ہے کہ راہل گاندھی کی صدارت میں پارٹی نے محنت تو کی ہے البتہ 52 سے زیادہ نشستیں حاصل کرنے میں کامیاب نہ ہو سکی۔

اب دیکھنا یہ ہے کہ راہل کے استعفے کے بعد پارٹی کی کمان کون سنبھالتا ہے۔