نئے پاکستان میں شدت پسندوں کے خلاف کاروائی کب ہوگی؟

بھارت اور پاکستان کے مابین جاری کشیدگی کے درمیان بھارتی وزارت خارجہ کے ترجمان رویش کمار نے صحافیوں سے بات چیت کرتے ہوئے ایک بار پھر پاکستان پر نکتہ چینی کی ہے۔

بھارتی وزارت خارجہ کے ترجمان رویش کمار نے ایک کانفرنس میں دوران خطاب کہا کہ اگر پاکستان دعوی کرتا ہے کہ اس کے پاس بھارت کے دوسرے جنگی طیارے کے گرانے کا ویڈیو ہے۔ تو وہ اسے دکھاتا کیوں نہیں ۔

بھارتی حکومت کی جانب سے رویش کمار نے کہا کہ اگر پاکستان 'نیا پاکستان' بنانے کا دعوی کرتا ہے تو اسے عسکریت پسند تنظیموں کے خلاف نئی کاروائیاں شروع کرنی چاہیے۔ انہوں نے کہا کہ نئے پاکستان میں شدت پسندوں کے خلاف کب کاروائی ہوگی اس کے ہم منتظر ہیں۔

انہوں نے صحافیوں سے خطاب کرتے ہوئے کہا کہ ہمارا صرف ایک ہی طیارہ تباہ ہوا ہے۔ پاکستان کا یہ دعوی کہ اس نے ہمارے دو طیارے تباہ کیے ہیں بالکل جھوٹا اور بے بنیاد ہے۔