'ایودھیا کیس پر سپریم کورٹ کا فیصلہ ہمیں قبول'

سپریم کورٹ میں بابری مسجد۔رام جنم بھومی ملکیت تنازعہ کیس کی سماعت گزشتہ روز چالیس دن چلنے کے بعد مکمل ہو گئی، اب ایک ماہ کے اندر سپریم کورٹ کی جانب سے اس کیس پر فیصلے کی امید کی جا رہی ہے۔

جماعت اسلامی ہند گجرات یونٹ کے صدر شکیل احمد راجپوت نے سپریم کورٹ ایودھیا کیس کی سماعت کے مکمل ہونے پر خوشی کا اظہار کیا ہے اور کہا کہ سپریم کورٹ کو اس معاملے بے لاگ فیصلہ سنانا چاہیے۔

شکیل احمد راجپوت نے امید ظاہر کی ہے کہ 'عدالت کا فیصلہ مسلم فریق کے حق میں آئے گا، ایسے میں عدالت جو بھی فیصلہ دے گی انھیں قبول ہوگا'۔

ویلفر پارٹی آف انڈیا گجرات کے صدر اکرام بیگ مرزا کا کہنا ہے کہ 'انھیں امید ہے کہ جس طرح سے مسلم فریق کی جانب سے ثبوت و شواہد پیش کیے گئے ہیں، اس کے پیش نظر فیصلہ مسلم فریق کے حق میں ہی آئے گا۔کیونکہ شریعت بھی یہی کہتی ہے کہ مسجد کسی غیر قانونی جگہ پر تعمیر نہیں کی جاتی'۔

انہوں نے کہا 'ملکیت کیس میں آستھا نہیں دیکھی جاتی بلکہ ثبوت دیکھا جاتا ہے، لیکن آخری فیصلہ سپرم کورٹ کے ہاتھ میں ہے ہم اس فیصلے کو تسلیم کریں گے'۔

چیف جسٹس رنجن گوگوئی کی سربراہی میں 5 ججوں کے آئینی بنچ نے اس تاریخی معاملے میں فیصلہ محفوظ کرلیا ہے۔

چیف جسٹس آئندہ ماہ 17 نومبر کو ریٹائر ہونے والے ہیں۔ توقع کی جارہی ہے کہ اس سے پہلے ایودھیا تنازعہ پر فیصلہ آ جائے گا۔