اترپردیش: سی اے اے مخالف مظاہروں پر چڑھتا سیاسی رنگ

اترپردیش میں شہریت ترمیمی قانون کے خلاف کسی بھی سیاسی پارٹی کے بینر کے بغیر خالص عام شہریوں کی جانب سے ہونے والے احتجاجی مظاہروں کے بعد اب ریاست کی مختلف سیاسی پارٹیوں نے مظاہروں کا سہرہ اپنے سر لینے اور اس ضمن میں عوامی ہمدردی حاصل کرنے کے لیے ایک دوسرے کو لعن طعن کرنا شروع کردیا۔

ریاست اترپردیش میں سی اے اے کے خلاف ہونے والے احتجاجی مظاہروں پر اب حکمراں جماعت و اپوزیشن پارٹیاں سیاسی روٹی سینکتی نظر آرہی ہیں۔ سماج وادی پارٹی جہاں حکومت آنے پر مظاہرین کو پینشن دینے تو وہیں کانگریس اس ضمن میں گرفتار افراد کو قانونی مدد فراہم کرنے کا اعلان کررہی ہے۔ تو وہیں حکمراں جماعت ان پارٹیوں پر حملہ آور ہوکر اسے ایک مخصوص طبقہ سے ہمدردی کا حوالہ دے کر سیاسی فائدہ اٹھانا چاہ رہی ہے۔

سماج وادی پارٹی کے مطابق سی اے اے کی مخالفت میں ہوئے احتجاجی مظاہروں میں کانگریس کہیں نہیں تھی۔ پوری ریاست میں سماج وادی کے کارکنوں نے اس قانون کے خلاف احتجاجی مظاہرے کیے ہیں۔

سماجوادی پارٹی (ایس پی) کے برسراقتدار آنےکے بعد شہریت ترمیمی قانون (سی اے اے 2019) کی مخالفت کرنے والوں کو 'آئین کے محافظ' کے طور پر پینشن دیا جائے گا۔

سماج وادی پارٹی کے رکن اسمبلی و یوپی اسمبلی میں اپوزیشن لیڈر رام گوند چودھری کہتے ہیں 'سی اے اے کے خلا ف ایس پی نے احتجاجی مظاہرہ کیا ہے کانگریس نے نہیں! انہوں نے الزام عائد کیا کہ میڈیا اہم حزب مخالف(ایس پی) کو نقصان پہنچانے کے لیے پرینکا اور کانگریس کو بڑھاوا دے رہی ہے'۔

کانگریس کی جانب سے مظاہرے کے دوران گرفتار لوگوں کو مفت قانونی مدد فراہم کرنے کے اعلان کے ساتھ پارٹی کی جنرل سکریٹری مہلوکین اور متأثرین کے اہل خانہ سے ملاقات کررہی ہیں۔ پرینکا نے پہلے بجنور جاکر متأثرین کے اہل خانہ سے ملاقات کی تو وہیں جمعہ کو مظفر نگر جاکر بھی وہ متأثرین کے اہل خانہ سے مل کر ان کی ڈھارس بندھائی۔

پرینکا نے ریاستی راجدھانی لکھنؤ پہنچ کر احتجاجی مظاہرے میں شرکت کی پاداش میں جیل میں بند پارٹی کارکن صدف جعفر کے اہل خانہ اور ان سے جیل میں ملاقات کے ساتھ ہی انہوں نے سماجی و کارکن و سابق آئی پی ایس افسر ایس دارا پوری سے بھی ملاقات کی۔

دوسری جانب اترپردیش کے نائب وزیر اعل دنیش شرما سماج وادی پارٹی اور کانگریس دونوں پر حملہ آور ہیں۔ انہوں نے کہاکہ قانون کے خلاف احتجاج کے دوران جس طرح سے تشدد ہوا اسے پورے ملک نے دیکھا ہے۔ ان کے مطابق قانون کی مخالفت میں پرتشدد مظاہرہ کرنے والوں کو ایک پارٹی پنشن دینے کی بات کہہ رہی ہے تو دوسری پارٹی قانونی مدد فراہم کرنے کی۔

ان کے مطابق ان دونوں پارٹیوں کا اصلی چہرہ اب عوام کے سامنے آرہا ہے۔ کانگریس اور سماج وادی پارٹی ووٹ کے لیے ملک کو تقسیم کرنا چاہتی ہیں۔

غور طلب ہے کہ شہریت ترمیمی قانون کے خلاف ہوئے احتجاجی مظاہروں کے دوران اترپردیش میں سب سے زیادہ تشدد کے واقعات پیش آئے، جن میں تقریبا 23 مظاہرین کے ہلاک ہوئے ہیں جبکہ 1100 سے زیادہ افراد کو گرفتار کیا جاچکا ہے۔ ریاستی حکومت نے تقریبا 372 افراد کے خلاف سرکاری املاک کو نقصان پہنچانے کے الزام میں ریکوری نوٹس بھی جاری کیا ہے۔

اترپردیش میں مظاہرین پر پولیس کی کارروائی سوالات کے گھیرے میں ہے تو وزیر اعلی یوگی آدتیہ ناتھ کے لہجے کی مذمت کی جارہی ہے۔