اے ٹی ایم دھوکہ دہی میں ایم بی اے کامیاب اور انجینئر گرفتار

نوجوانوں میں شارٹ کٹ سےجلد امیر بننے کا لالچ اس قدر بڑھتا جارہا ہے کہ وہ جعلسازی جیسے غلط راستے کا انتخاب کرنے سے باز نہیں آتے۔

نوئیڈا میں ایک واقعہ سامنے آیا ہے ، جہاں پولیس نے ایک انجینئر اور ایم بی اے کامیاب نوجوان کو دھوکہ دہی کے الزام میں گرفتار کیا ہے۔

ایس پی (دیہی) رن وجے سنگھ نےبتایا کہ منگل کی رات ایک اطلاع کی بنیاد پر تھانہ بیٹا 2 پولیس نے منیش اور پرشانت نامی دو افراد کو گرفتار کیا۔ پولیس نے ان کے پاس سے 10،700 روپے کی نقد رقم ، 10 اے ٹی ایم کارڈز ، 2 پین کارڈز ، آدھار کارڈز وغیرہ برآمد کرلیے ہیں۔

ایس پی نے بتایا کہ دوران تفتیش گرفتار شرپسندوں نے پولیس کو بتایا کہ وہ لوگوں سے کسی نہ کسی طرح اے ٹی ایم کا پن کوڈ حاصل کرتے ہیں اور بعد میں پن کوڈ کی بنیاد پر اپنے اے ٹی ایم سے رقم نکال لیتے ہیں۔
ایس پی نے بتایا کہ گرفتار ملزمان میں منیش نے ایم بی اے تک تعلیم حاصل کی ہے، جبکہ پرشانت نے انجینئرنگ کی تعلیم حاصل کی ہے۔
انہوں نے بتایا کہ تفتیش کے دوران دونوں ملزمان نے پولیس کو بتایا کہ ان افراد نے اے ٹی ایم سے رقم نکلوانے کے درجنوں واقعات کیے ہیں۔
پولیس اس معاملے میں پوچھ گچھ کر رہی ہے۔