وزیراعلیٰ تریویندر سنگھ نے کووڈ کیئر سینٹر کا معائنہ کیا

اتراکھنڈ کے وزیر اعلی تریویندر سنگھ راوت نے جمعرات کے روز انٹرنیشنل کرکٹ اسٹیڈیم رائے پور میں 750 بستروں والے کووڈ کیئر سینٹر کا معائنہ کیا۔ ضرورت پڑنے پر اس سینٹر میں بیڈز کی تعداد ایک ہزار سے چار ہزار تک کی جاسکتی ہے۔

مسٹر تریویندر نے کہا کہ کووڈ 19 کے پیش نظرریاستی حکومت نے حفاظتی نقطہ نظر سے ہر ممکن کوشش کی ہے۔ انٹرنیشنل کرکٹ اسٹیڈیم رائے پور میں کووڈ کے پیش نظر ہائی ٹیک سہولیات دستیاب کرانے کی کوشش کی گئی ہے۔ حکومت، پولیس اور محکمہ صحت کے ساتھ ہی رضاکار تنظیموں نے بھی اس کے لئے تعاون کیا ہے۔

انہوں نے کہا کہ کووڈ 19 پر قابو پانے اور روزگار کے مواقع فراہم کرانا ریاستی حکومت کی اولین ترجیحات میں شامل ہے۔وزیراعلیٰ نے کہا کہ کورونا پر قابو پانے کے لئے جس طرح سے ریاست میں احتیاطی تدابیر اختیار کی گئی ہیں ، امید ہے کہ ہم جلد ہی صورتحال پر قابو پا لیں گے۔

انہوں نے کہا کہ ریاست میں کورونا مثبت مریضوں کی صحت یابی کی شرح میں اضافہ ہوا ہے ، ڈبلنگ ریٹ میں بھی بہتری آئی ہے۔ ابھی ہمارا ریکوری ریٹ 65 فیصد ہے اور ڈبلنگ ریٹ 25 دن ہے۔

اس موقع پر ماہر ماحولیات ڈاکٹر انیل پرکاش جوشی ، سکریٹری صحت امیت نیگی ، ڈی جی پی لاء اینڈ آرڈر اشوک کمار ، آئی جی میلا سنجے گنجیال ، کمانڈنٹ ایس ڈی آر ایف ترپتی بھٹ ، سی ایم او دہرادون ڈاکٹر وی سی رمولا ، ایڈیشنل ڈسٹرکٹ مجسٹریٹ بیر سنگھ بڑیال وغیرہ موجود تھے۔