انلاک۔4: دیگرشعبوں میں رعایت لیکن عبادتگاہوں کے لیے کچھ نیا نہیں

ریاست اترپردیش میں یکم ستمبر سے انلاک 4 شروع ہونے کے بعد جہاں دیگر شعبوں میں راحت ملی ہے۔ وہیں کاروباریوں کو راحت دیتے ہوئے ہفتہ واری دو روزہ لاک ڈاؤن اب یک روزہ کر دیا گیا ہے۔

ضلع رامپور کے بازاروں اور دیگر مقامات پر بھی عام دنوں جیسی سرگرمیاں نظر آنے لگی ہیں، لیکن جامع مسجد رامپور سمیت تمام مساجد میں لاک ڈاؤن کے زمانہ سے ہی صرف پانچ مصلیان نماز کے لئے مسجد پہنچ رہے ہیں۔

نائب امام جامع مسجد مولانا حسیب احمد نے کہا کہ عبادات کے تعلق سے انلاک 4 کی گائیڈ لائن میں کوئی رعایت نہیں دی گئی ہے۔

انہوں نے مزید یہ بھی کہاکہ' انلاک 4 کی گائیڈ لائن میں بھی مسجد میں نماز کی ادائیگی سے متعلق کوئی تذکرہ نہیں ہے، اس لئے ائمہ اور ذمہ داران مساجد پس و پیش میں ہیں کہ کب اور کیسے عبادات کے لئے بھی رعایات حاصل ہوگی۔