کسانوں پر لاٹھی چارج کا معاملہ عدالت پہنچ گیا

پنجاب اور ہریانہ ہائی کورٹ نے آج ہریانہ کے پولیس ڈائریکٹر جنرل کو ہدایت دی ہے کہ تمام پولیس اہلکاراپنی مکمل شناخت ، وردی اور نیم پلیٹ کے ساتھ ہی ڈیوٹی پر تعینات ہوں ۔ ڈیوٹی پر موجود تمام ملازمین کی تفصیلی معلومات رجسٹر میں درج ہو اور پولیس کارروائی کے دوران زخمی مظاہرین کسانوں کو فوری طور پر طبی امداد فراہم کی جائے ۔

مرکز کے زرعی آرڈیننس کے خلاف 10 ستمبر کو پیپلی ریلی کے دوران کووکشیتر میں کسانوں پرہوئے لاٹھی چارج کی جانچ کے لئے اور آئندہ ایسے واقعات پر روک لگانے کے لئے ’سب کا منگل ہو‘ تنظیم سے منسلک ’ہریانہ پروگریسو فارمر یونین‘ کی درخواست پر جمعہ کو ہوئی سماعت کے بعد ہائی کورٹ نے پولیس کے ڈائریکٹر جنرل کو ہدایت دی کہ ڈی کے باسو بنام مغربی بنگال کیس میں سپریم کورٹ کی جانب سے دی گئی ہدایات پر سختی سے عمل ہو ۔

ہریانہ پروگریسوفارمر یونین کے کنوینر دیپک لوہن نے وکیل پردیپ رپیڈیا اور پروین کمار کے ذریعہ ہائیکورٹ میں ایک عرضی داخل کرتے ہوئے کہا کہ زرعی آرڈیننس کے خلاف احتجاجی ریلی نکال رہے کسانوں پر پولیس کے بھیس میں بغیر وردی والے شخص نے کئی کسانوں کے سر پھوڑ دیے ۔ یہاں تک کہ جان بچا کر بھاگتے ہوئے بزرگوں کو بھی نہیں بخشا گیا۔