یوگی حکومت کے نئے ایپ سے اساتذہ پریشان

اترپردیش کی یوگی حکومت نے سرکاری اور پرائمری اسکول کے اساتذہ پر نکیل کسنے کا ایک اور طریقہ نکال لیا ہے۔ اب پریرنا ایپ کے نام سے لانچ کیے گئے نئے ایپ سے پرائمری اسکولز کی ایک دن میں تین بار رپورٹ لی جائے گی۔

پریرنا ایپ کے ذریعہ صبح اسکول شروع ہونے، پھر دوپہر میں بچوں کو مڈ ڈے میل دینے اور آخر میں اسکول کی چھٹی کے وقت نگرانی کی جائے گی حالانکہ اس نئے ایپ سے اساتذہ کافی دقت محسوس کر رہے ہیں۔

اساتذہ کے مطابق اس ایپ کے لانچ ہونے کے بعد بچوں کا تعلیمی نظام کافی متاثر ہوا ہے۔ اساتذہ کہتے ہیں کہ اکثر موبائل فون کا نیٹ ورک فیل رہتا ہے۔ ایسی صورت میں وقت سے ایپ کے ذریعہ جانکاری دینا ممکن نہیں ہے۔

اس مسئلے پر ای ٹی وی بھارت نے ضلع مئو کے اسکولوں کے اساتذہ اور ضلع بیسک تعلیم آفیسر سے بات چیت کی تو انہوں نے بھی پریرنا ایپ سے شروع میں دقت پیش آ نے پر اتفاق کیا۔

علاقہ کے کاؤنسلر کے مطابق اساتذہ کو درس و تدریس کے علاوہ بھی کافی ذمہ داری دے دی گئی ہے۔ یہ بچوں کے ساتھ نا انصافی ہے۔