حصار میں ان لاک ۔4 میں سینما ہال اور سوئمنگ پول بند رہیں گے

ریاست ہریانہ میں ضلع حصار کی ڈپٹی کمشنر، ڈاکٹر پریانکا سونی نے کہا کہ ضلع میں سرکاری اسپتالوں، صحت مراکز اور دو نجی لیبوں میں کورونا ٹیسٹنگ کی سہولت دستیاب ہے۔ اس کے علاوہ ان لاک 4 میں سینما ہال، سوئمنگ پول اور تفریحی مقام فی الحال کھولے نہیں جائیں گے۔

ڈاکٹر سونی نے بتایا کہ ضلع میں کورونا کو کنٹرول کرنے کے لئے نمونوں کی جانچ میں اضافہ کیا گیا ہے تاکہ تمام متاثرہ افراد کی شناخت کی جاسکے اور ان کا فوری علاج کیا جاسکے اور دوسرے کو بھی انفیکشن سے بچایا جاسکے۔

انہوں نے کہا کہ ضلع کے تمام اسکول، اسپتالوں اور صحت مراکز میں کورونا ٹیسٹ کے نمونے دیئے جاسکتے ہیں۔ ان کے علاوہ یہ سہولت دو نجی لیبوں میں بھی دستیاب ہے۔ نجی لیبوں میں جانچ کی فیس میں کمی کردی گئی ہے۔ ریپڈ اینٹیجن جانچ کے لئے 650 روپے، آر ٹی پی سی آر کے لئے 1600 روپے مقرر کئے گئے ہیں، جو اس سے پہلے 2400 روپے تھے۔ تفتیشی رپورٹ ضلعی ویب سائٹ حصار ڈاٹ جی او وی ڈاٹ ان پر دستیاب ہوگی۔

ڈپٹی کمشنر کے مطابق ضلع میں اب تک 2322 کورونا مثبت مریض پائے گئے ہیں جن میں سے 1600 افراد صحت یاب ہوکر گھر چلے گئے ہیں۔ اس وقت 708 فعال مریض ہیں اور 14 مریض فوت ہوئے ہیں۔ ضلع میں آکسیجن پر 61 مریض ہیں جبکہ وینٹی لیٹر پر مریض نہیں ہیں۔ ضلع میں، 171 مریض کووڈ کیئر سنٹر میں داخل ہیں اور 464 مریضوں کو گھر پر آئسولیشن میں رکھا گیا ہے۔ انہوں نے عام لوگوں سے مطالبہ کیا کہ وہ کورونا کو سرسری طور پر نہ لیں۔ کھانسی، بخار، سردی، سانس لینے میں دشواری یا کورونا کی دیگر علامات ظاہر ہونے پر جانچ ضرور کرائیں۔