تیجسوی یادو نے میڈیا سے خطاب میں کہا کہ ان کی پارٹی نے دہلی اسمبلی انتخاب لڑنے کا فیصلہ لیا ہے پہلے بھی ان کی پارٹی نے وہاں سے انتخاب لڑا ہے اور جیتا بھی ہے۔
انہوں نے کہا کہ کانگریس کے ساتھ ان کی پارٹی کا مرکز اور بہار میں اتحاد ہے، اس لیے ان کی کوشش اب یہ ہوگی کہ کانگریس کے ساتھ اتحاد کر کے اس مرتبہ انتخاب لڑا جائے ۔
آرجے ڈی رہنما کا یہ بھی کہنا ہے کہ اگر کانگریس کے ساتھ سیٹوں کا قابل قدر سمجھوتا ہوتا ہے تو اس کے ساتھ اتحاد ہوسکتا ہے اور اس کے لیے پارٹی نے راجیہ سبھا رکن منوج جھا اور آرجے ڈی کے قومی جنرل سکریٹری قمر عالم کو دہلی انتخاب کا انچارج مقرر کیا ہے ۔
تیجسوی یادو سے جب پوچھا گیا کہ کانگریس کے ساتھ کتنی سیٹ پر بات چیت ہورہی ہے اس پر انہوں نے کہا کہ اس بارے میں منوج جھا ہی بتائیں گے۔
انہوں نے کہا کہ دہلی میں بہار کے بہت سے لوگ رہتے ہیں جن جگہوں پر پارٹی کی پکڑ مضبوط ہے ان سیٹوں پر انتخاب لڑنے کے لیے پارٹی کی تیاری ہے ۔
اپوزیشن رہنما نے اتر پردیش کے وزیراعلیٰ یوگی آدتیہ ناتھ کے دورے سے متعلق پوچھے گئے سوال کے جواب میں کہ یہ لوگ زہر گھولنے کی کوشش کر رہے ہیں، وہ پہلے اپنی ریاست کو سنبھال لیں وہاں کیا صورتحال بنی ہوئی ہے یہ سب جانتے ہیں۔
انہوں نے کہا کہ بہار کے لوگ ان کے طور طریقوں سے اچھی طرح واقف ہیں وہ کتنا بھی زہر بوئیں، بہار نفرت کو کاٹ کر اتحاد کو دکھانے کا کام کرے گا کیونکہ بہار کے لوگ گوڈسے کو ماننے والے نہیں ہیں۔
انہوں نے کہا کہ شہریت ترمیمی قانون ( سی اے اے ) اور قومی شہریت رجسٹر ( این آر سی ) کو لے کر گیا میں خواتین مظاہرہ کر رہی ہیں وہ انہیں حمایت دینے کے لیے ان کے پاس جارہے ہیں اس کے بعد وہ جلد ہی پٹنہ کے سبزی باغ میں بھی تحریک کاروں کے درمیان آئیں گے ۔
