بھارتی ریاست آسام کے مختلف علاقوں میں شہریت ترمیمی بل کے خلاف مظاہروں میں شدت آگئی ہے۔
ضلع جورہاٹ میں پولیس اور مظاہرین کے درمیان ہاتھا پائی ہوئی۔ بھیڑ پر قابو پانے کے لیے پولیس نے لاٹھی چارج اور ہوائی فائرنگ بھی کی، اس کے جواب میں مظاہرین نے پولیس پر پتھراؤ کر دیا۔
اس دوران سکیورٹی فورسز کے متعدد افراد اور مظاہرین زخمی ہوئے ہیں۔
دارالحکومت گوہاٹی سمیت آسام کے مختلف علاقوں سے اس طرح کے حادثات کی خبریں موصول ہوئی ہیں۔ مظاہرے ابھی بھی جاری ہیں اور وہ بھی پوری شدت کے ساتھ۔
لوگوں کا مطالبہ ہے کہ مرکزی حکومت شہریت ترمیمی بل کو واپس لے۔ اس کے ساتھ ہی ریاست ترپورہ میں ممکنہ احتجاج کو روکنی غرض سے انٹرنیٹ کی خدمات کو معطل کر دیا ہے۔
