سونو نگم نے چینی مصنوعات کا بائیکاٹ کرنے کی اپیل کی

سونو نگم نے لوگوں سے اپیل کرتے ہوئے کہا کہ 'میں جانتا ہوں کہ بہت ساری چیزیں ایسی ہوں گی جنہیں چھوڑنا آپ کے لئے مشکل ہوگا۔ لیکن اگر ہم یہ سب کرنے کا عزم کریں تو شاید یہ ممکن ہے۔'

بالی ووڈ کے مشہور گلوکار سونو نگم نے لوگوں سے چینی سامان کا بائیکاٹ کرنے کی اپیل کی ہے۔ بھارت اور چین کے مابین سرحدی تنازعہ پر جاری تعطل کے درمیان مرکزی حکومت نے چین کے 59 ایپ پر پابندی عائد کردی ہے اور لوگ حکومت کے اس فیصلے کا خیرمقدم کررہے ہیں۔

سونو نے چینی ایپ پر پابندی کی حمایت کرتے ہوئے لوگوں سے چینی سامان کے بائیکاٹ کرنے کی اپیل کی ہے۔

سونو نگم نے اپنے انسٹاگرام اکاؤنٹ پر ایک ویڈیو شیئر کی ہے۔ اس ویڈیو میں انہوں نے کہا 'بدقسمتی ہے کہ چین سمجھداری یا پیار کی زبان سمجھنے سے قاصر ہے اور وہ ہمارے اہل وطن، ہمارے فوجیوں کو چیلنج کررہا ہے۔

انہوں نے کہا کہ 'میں آپ لوگوں سے بھی گزارش کرنا چاہتا ہوں کہ اگر آپ سے ہوسکے، جو کہ ہونا ہی چاہئے تو چینی مصنوعات کا بائیکاٹ کریں۔ اتنا تو ہم کرسکتے ہیں۔ ہمارے فوجیوں کے لئے، ہمارے ملک کے لئے، لوگ سرحد پر جاکر اپنا خون بہا رہے ہیں، اپنی جان دے رہے ہیں اور ہم صرف اتنا نہیں کر سکتے کہ چینی مصنوعات کا استعمال بند کردیں۔

انہوں نے کہا کہ 'میں جانتا ہوں کہ بہت ساری چیزیں ایسی ہوں گی جنہیں چھوڑنا آپ کے لئے مشکل ہوگا۔ لیکن اگر ہم یہ سب کرنے کا عزم کریں تو شاید یہ ممکن ہے۔'