کورونا: تمل ناڈو میں اسکول کھلنے کی امید نہیں

کورونا وائرس سے شدید طورپر متاثر اور ملک بھر میں تیسرے مقام پر تمل ناڈو میں موجودہ حالات کی وجہ سے اسکولوں کے پھر سے کھولے جانے کا فی الحال کوئی امکان نہیں ہے۔

وزیر تعلیم کے اے سین گوٹیان نے ہفتے کو یہاں نامہ نگاروں سے بات چیت میں اس ضمن میں امکان ظاہر کیا۔

انہوں نے کہا کہ وزیراعلیٰ ای کے پلانی سوامی سے غور و خوض کے بعد آن لائن کلاس کے بارے میں فیصلہ کیا جائےگا۔

انہوں نے کہا کہ اس بارے میں اگلے دو دنوں میں فیصلہ کیا جائے گا۔

واضح رہے کہ کورونا وائرس سے متاثر ہونے کے معاملے میں تمل ناڈو تیسرے نمبر پر ہے، جہاں کُل متاثرین کی تعداد اب 75000 کے قریب پہنچ گئی ہے اور اب تک اس وائرس سے 957 لوگوں کی موت ہوئی ہے۔

صرف دارالحکومت چنئی میں ہی تقریباً 50000 لوگ متاثر ہوئے ہیں۔