شام میں روسی طیاروں کی بمباری میں 11 ہلاک

شورش زدہ شام کے خان شیخون میں روسی جنگی طیاروں کی بمباری سے صحافی سمیت 11 شہری ہلاک ہوگئے۔

غیر ملکی خبررساں ایجنسی اے ایف پی نے شام میں موجود برطانوی مبصر گروپ کا حوالہ دیتے ہوئے بتایا کہ ادلب کے علاقے خان شیخون میں روسی جنگی طیاروں کی بمباری سے وائٹ ہیلمٹ میں شامل 20 سالہ فوٹو جرنلسٹ بھی ہلاک ہوگیا۔

جبکہ دوسری جانب وائٹ ہیلمٹ نے ٹوئٹر پر 'انس الدیاب کی موت پر افسوس کا اظہار کیا'۔

اس کے علاوہ بتایا گیا کہ فوٹو جرنلسٹ سیرین سول ڈیفنس سینٹر کے لیے رضاکارانہ طور پر بھی کام کرتا تھا۔

اس حوالے سے مزید بتایا گیا کہ انس الدیاب خبررساں ایجنسی اے ایف پی کے لیے اپنی صحافتی خدمات پیش کرتا تھا۔

واضح رہے کہ حلب کے بڑے حصہ پر باغیوں اور انتہا پسند گروپز کا اب بھی قبضہ ہے اور محض ایک حصے پر روس کی حمایت یافتہ حکومت کا کنٹرول ہے۔

خیال رہے کہ سیرین آبزرویٹری کے مطابق صوبہ ادلب کے قریب حملہ کیا گیا جو شامی فورسز اور جنگجوؤں کے مابین معاہدے کے چھ ماہ بعد سب سے خوفناک حملہ تھا۔