شمالی دہلی کے کستوربا اسپتال کی ڈاکٹرز ایسوسی ایشن نے تنخواہ وقت پر ادا نہ کیے جانے پر بڑے پیمانے پر استعفیٰ دینے کا فیصلہ کیا ہے۔ ان کا کہنا ہے کہ انہیں پچھلے تین مہینوں سے تنخواہیں نہیں ملی ہے۔
کستوربا اسپتال کے ریذیڈنٹ ڈاکٹرز کی ایسوسی ایشن کے صدر ڈاکٹر سنیل کمار نے کہا کہ 'کستوربا اسپتال کے رہائشی ڈاکٹرز نے بڑے پیمانے پر استعفیٰ دینے کا فیصلہ کیا ہے کیونکہ ہڑتال پر جانے کا یہ مناسب وقت نہیں ہے'۔
کمار نے الزام لگایا ہے کہ 'ریذیڈنٹ ڈاکٹرز کو پچھلے تین مہینوں سے تنخواہ نہیں ملی ہے۔ اسپتال کے تمام ریذیڈنٹ ڈاکٹروں کو پچھلے تین ماہ (مارچ ، اپریل اور مئی) سے تنخواہیں موصول نہیں ہوئی ہیں۔ کیونکہ ہڑتال پر جانے کا یہ مناسب وقت نہیں ہے، لہذا ہم نے بڑے پیمانے پر استعفی دینے کا فیصلہ کیا ہے'۔
ریذیڈنٹ ڈاکٹرز کی ایسوسی ایشن کے صدر ڈاکٹر سنیل کمار کا کہنا ہے کہ 'لوگ ہمارے لئے تالیاں بجاتے ہوئے 'کورونا سپاہی' کے طور پر استقبال کر رہے ہیں۔ یہ اچھی بات ہے کہ لوگ ہماری عزت کرتے ہیں۔ لیکن میں یہ پوچھنا چاہتا ہوں کہ کیا ہمارا احترام کرنا بس یہی ہے؟ ہم اپنی تنخواہ چاہتے ہیں۔ میں چاہتا ہوں کہ لوگوں کو اس کے بارے میں معلوم ہونا چاہئے۔ دہلی میں ڈاکٹروں کو تنخواہیں نہیں مل رہی ہیں'۔
دریں اثنا صدر کمار سمیت کستوربا اسپتال کی ریذیڈنٹ ڈاکٹرز ایسوسی ایشن کے اراکین نے اسپتال کے ایڈیشنل ایم ایس کو ایک خط لکھا ہے جس میں کہا گیا ہے کہ اگر 16 جون تک ڈاکٹرز کو معاوضہ ادا نہیں کیا گیا تو وہ بڑے پیمانے پر استعفیٰ دیں گے۔
